Parlamentuko Osoko Bilkurak, Bildu-k, Aralar-Nabaik, I-Ek eta atxiki gabekoek haren alde emandako botoekin, UPNren eta SNren abstentzioarekin eta PPNk haren aurka emandako botoarekin, 20/2012 Foru Legea aldatzeko Lege proposamena aintzat hartzea onetsi du gaur, zeinak toki ogasunek transferentzia arrunten bidez Nafarroako tributuetan parte hartzeko duten funtsaren zenbatekoa eta banatzeko formula ezartzen dituen 2013ko eta 2014ko aurrekontu-ekitaldietarako.

Bildu-k eta Aralar-Nabaik aurkeztu duten Foru Lege proposamenaren xedea da 20/2013 Foru Legearen 15 g artikulua kentzea, zeinak kargu hautatuan aritzeagatik egindako konpentsazioak “deuseztatzea edo atxikitzea” baimentzen duen Nafarroako sinboloei buruzko 24/2003 Foru Legea eta Terrorismoaren biktimei laguntzeko 9/2010 Foru Legea “betetzen ez diren” kasuetan.

Proposatu duten taldeek Nafarroako Kontseiluak egindako irizpenean oinarritzen dute haien ekimena, izan ere, ulertzen baitu aipatu xedapena “toki autonomiaren eta toki korporazioek Estatuaren tributuetan duten parte-hartzearen kontrakoa izan daitekeela”; aurreikuspen horiek Konstituzioak 140 eta 142 artikuluetan jasotzen ditu, hurrenez hurren.

Honakoa dio kargu hautatuan aritzeagatik egindako ordainketak direla-eta Nafarroako udalei egindako konpentsazioei buruz 15 g) artikuluak, 20/2012 Foru Legea aldatzeko Lege proposamenak kendu egiten duenak:

g) Aurreko idatz-zatietan jasotako konpentsazioak deuseztatu edo eten eginen dira, honako kasu hauetan:

1. Nafarroako Sinboloei buruzko apirilaren 4ko 24/2003 Foru Legearen ez-betetzea:

Urte bakoitzerako ematen diren konpentsazioen deuseztapena aplikatuko zaie araua ez betetzea ekarri duten jarduketa edo jarduketak, zuzenean edo zeharka, babesten dituzten udal eta kontzejuetako alkateari, alkatetzako taldeari eta udaletako talde eta zinegotziei.

Nafarroako Gobernuak, urtero eta ekitaldi ekonomikoa itxi aitzin, egiaztatuko du toki entitateak 24/2003 Foru Legea bete dutela.

Legea betetzen ez bada, Nafarroako Gobernuak dagokion toki entitateari igorriko dio eskaera bat kargu publiko hautatuan aritzeagatik kobraturiko ordainsariak itzultzeko. Itzulketa horren kopurua izanen da 24/2003 Foru Legea ez-betetzearekin, zuzenean edo zeharka, lotutako alkate eta zinegotziei dagokiena.

Toki entitateak eskatzen zaion kopurua itzultzen ez badu, Nafarroako Gobernuak ordaindu gabeko zorra konpentsatuko du datozen ekitaldi ekonomikoetan kontzeptu beragatik toki entitateak kobratu beharrekoaren kontura.

24/2003 Foru Legea ez betetzeagatik prozesu judizial edo administratiboak ondorioztatzen diren egoeratan, alde batera utzita zein den jatorria, Nafarroako Gobernuak atxikiko ditu 24/2003 Foru Legea ez-betetzearekin, zuzenean edo zeharka, lotutako alkate eta zinegotziei ordaindu beharreko kantitateak. Atxikitze horrek iraunen du epai judizial edo administratibo irmo bat izan bitarte. Epai hori dagonenean, berriz, arestian jasotako deuseztapen- edo itzulpen-baldintzak aplikatuko dira, baldin eta epaian erabakitzen bada aipatu foru legearen ez-betetze erabatekoa nahiz partziala egon dela.

Konpentsazioak atxikitzean, urtez urteko ekitaldiak metatuko dira, prozesu judizial edo administratiboa bukatzen ez den bitartean.

2. Terrorismoaren Biktimei Laguntzeko 9/2010 Foru Legearen ez-betetzea:

Urte bakoitzeko ematen diren konpentsazioen deuseztapena aplikatuko zaie 9/2012 Foru Legea ez betetzea ekarri duten jarduketa edo jarduketak, zuzenean edo zeharka, babestu dituzten udal eta kontzejuetako alkateari, alkatetzako taldeari eta udaletako talde eta zinegotziei.

Nafarroako Gobernuak, urtero eta ekitaldi ekonomikoa itxi aitzin, egiaztatuko du toki entitateek 9/2010 Foru Legea bete dutela.

Legea betetzen ez bada, Nafarroako Gobernuak dagokion toki entitateari igorriko dio eskaera bat kargu publiko hautatuan aritzeagatik kobraturiko ordainsariak itzultzeko. Itzulketa horren kopurua izanen da 9/2010 Foru Legea ez-betetzearekin, zuzenean edo zeharka, lotutako alkate eta zinegotziei dagokiena.

Toki entitateak eskatzen zaion kopurua itzultzen ez badu, Nafarroako Gobernuak ordaindu gabeko zorra konpentsatuko du datozen ekitaldi ekonomikoetan kontzeptu beragatik toki entitateak kobratu beharrekoaren kontura.

9/2010 Foru Legea ez betetzeagatik prozesu judizial edo administratiboak ondorioztatzen diren kasuetan, alde batera utzita zein den jatorria, Nafarroako Gobernuak atxikiko ditu 9/2010 Foru Legea ez-betetzearekin, zuzenean edo zeharka, lotutako alkate eta zinegotziei ordaindu beharreko kantitateak. Atxikitze horrek iraunen du epai judizial edo administratibo irmo bat izan bitarte. Epai hori dagoenean, berriz, arestian jasotako deuseztapen- edo itzulpen-baldintzak aplikatuko dira, baldin eta epaian erabakitzen bada aipatu foru legearen ez-betetze erabatekoa nahiz partziala egon dela.

Konpentsazioak atxikitzean, urtez urteko ekitaldiak metatuko dira, prozesu judizial edo administratiboa bukatzen ez den bitartean.

Konpentsazioen deuseztapena aplikatuko da, halaber, lokal edo eraikin publikoak entitate edo kolektiboei lagatzeko kasuetan, baldin eta indarkeria laguntzeko edo terrorismoaren, talde terroristen edo legez kanpoko erakundeen apologia egiteko edo haiei gorazarre egiteko egoerak gertatzen badira.

Deuseztatzea aplikatuko da, halaber, arestiko puntuarekin lotuta dauden pintaketak, afixak edo sinboloak nahiz elementuak lokal edo eraikin publikoetan jartzearen kasuetan.

Deuseztapena aplikatuko zaie, halaber, lokal edo eraikin publikoetan burututako ekintzei, baldin eta haietan terrorismoaren biktimen oroimenari irain egiten bazaie, biktimen edo haien familien ospe txarra, gutxiespena edo umiliatzea dakarten ekintzen bitartez.

• www.parlamento-navarra.es
• Foru Lege proposamenaren argitalpena (NPAO, 50. zk., 2013-05-13koa)