Parlamentuko Osoko Bilkurak, SNk, Bildu-k, Aralar-Nabaik, PPNk, I-Ek eta atxiki gabekoek haren alde emandako botoekin eta UPNk haren aurka emandako botoarekin, ebazpen bat onetsi du gaur zeinaren bidez Parlamentuak “ezinbestekotzat jotzen du Itoitz-Nafarroako Ubidea Fundazioaren eta Esa Fundazioaren kentzeak eraginik ez izatea auditoriak egiteko premian eta betebeharrean, Parlamentu honek adierazi bezala. Hori dela-eta, Nafarroako Gobernuari exijitzen dio Kontuen Ganberaren esku jar dezan eskatutako eta egiteke dauden auditoriak egin ahal izateko dagoen informazio guztia”.

Zioen azalpenean, Socialistas de Navarra, Bildu, Aralar-Nabai, PPN eta I-E parlamentu-taldeek bultzatu duten ebazpenak bi fundazioen auditoriak egiteko eskaera errepikatzen du, nahiz eta gobernuak biak ala biak salbuesteko erabakia bultzatu duen, iragan urtarrilaren 22ko gobernu-saioaren ondoren jakitera eman zen Nafarroako Administrazio Publikoaren egiturak txikiagotzeko prozesuaren esparruan.

Gobernuaren datuen arabera, Itoitz-Nafarroako Ubidea Fundazioak 2003, sortu zen urtea, eta 2011, jarduera erregistratu zen azken ekitaldia, bitarte 8 milioi euro inguru kudeatu ditu. Epe horretan 200 proiektu baino gehiago burutu edo lagundu ditu.

Esa Fundazioak, eskualdean jarduera bultzatzeko eta ingurumena babesteko sortu zenak, “ez du inoiz jarduerarik izan”.

• www.parlamentodenavarra.es
• Mozioaren argitalpena (NPAO, 31. zk., 2014-02-21ekoa)