Nafarroako Parlamentuko lehendakari Ainhoa Aznárezek gaur, Esklerosi Anizkoitzaren Mundu Eguna gogorarazteko ekitaldian, zeina Osoko Bilkuren aretoan egin baita, nabarmendu du Parlamentuak konpromisoa hartua duela “desgaitasuna duten pertsonen independentzia eta autonomia funtzionala bermatzera bideratutako ekimen eta ekintza guztiekiko.

Aznárezek Parlamentuaren gaitasun politikoa azpimarratu du, eta “politika publikoak erabakitzeko gunea” denez, eskatu du “bestelako begirada bat izatea politika integratzaileak eskatzen dituzten gaiei, esklerosi anizkoitzarena esate baterako, modu naturalean ekiteko. Guztiok gogoeta bat egin beharra daukagu errealitate honi buruz, zeinak 670 nafarrengan eta haien ingurune sozial eta familiarrean eragiten baitu”.

Adierazitakoaren ildotik eta “emantzipazio funtzionalaren” inguruan abiatutako kontzientziazio kanpainarekin bat, “funtsezko elementua baita hori gaixotasuna eragozpen bihur dadin saihesteko”, lehendakariak Giza Eskubideen Adierazpen Unibertsala aipatu du, eta horretan oinarrituta “duintasunaren eta giza eskubideen errekonozimendua" nabarmendu du, "askatasunaren, justiziaren eta bakearen berme-emaile gisa".

Amaiera gisa, Ainhoa Aznárezek berretsi du “oinarrizko eskubide eta askatasun guztiak unibertsalak, banaezinak eta elkarren menpekoak direla”, eta dei egin du “desgaitasuna duten pertsona guztien gizarteratze osoa bermatzeko, bazterketarik gabe”.

Ondoren, Blanca Esther Villanuevak, ADEMNA-Nafarroako Esklerosi Anizkoitzaren Elkarteko lehendakariordeak, nabarmendu du zeinen “ekitaldi garrantzitsua eta hunkigarria egin izana, Nafarroako Parlamentua geureago sentiarazten diguna. Eskerrak ematen ditugu hemendik, Nafarroako gizarte osoa gure aldarrikapenen partaide egiteko aukera eman diguzuelako”.

Hurrena, 2016ko Manifestua irakurri da, non, funtsean, administrazioei gogorarazten zaizkien esklerosi anizkoitza duten pertsonen bizitza hobetzera bideratutako proposamenak.

Ildo horretatik, eta Nafarroako Parlamentuak martxoaren 10eko Osoko Bilkuran onetsitako ebazpenarekin bat, botere publikoei dei egiten zaie “gaixotasunaren berariazkotasuna kontuan har dezten baremoen berrikuspenean eta gaurkotzean eta, are gehiago, diagnostikoa lotu dezaten desgaitasunaren % 33ko errekonozimendu automatikoarekin”.

Aldi berean, apustu irmoa eskatzen da ikerketaren eta terapia berrietarako sarbidearen alde, eta nabarmentzen da gisa guztietako oztopoak kendu behar direla, fisikoa, lanekoak zein sozialak, garapen pertsonala eragozten dutenak.

Ondoren, parlamentu-taldeetako eledunak tribunara igo dira, eta kolektiboaren aldarrikapenak beren gain hartu ondoren, ADEMNAren lana balioan jarri dute, gaixotasuna dutenen sendotasuna azpimarratu dute, eta eskatu dute iragan dadila borondate politikotik eskubideen berme eraginkorrera.

Maribel García Malok (UPN parlamentu-taldea) "erantzukizun publikoa eskatu du, behar diren baliabideak ikerketara eta gaixotasunaren tratamendu egokira zuzentzeko. Ahal den bizi-garapen onena erraztea da helburua. Parlamentu honen egitekoa da hori horrela izan dadila."

Koldo Martínezek (Geroa Bai parlamentu-taldea) adierazi du “mila aurpegi dituen eta 2,5 milioi pertsonarengan eragina duen gaixotasun baten aurrean gaudela. Orain dela 140 urte ezagutu zen, baina sintomak arintzen dituen lehenengo sendagaia duela 20 urte sortu zen. Aurreikusten ezinezkoa den gaixotasuna da, zeinak, halere, ez baitizue eragozten aske izatea”.

Bakartxo Ruizek (EH Bildu parlamentu-taldea) nabarmendu du “nolako hurbiltasunaz helarazi diguzuen zuen errealitatea; agian, horixe da zuen eskubideen defentsan parte hartzera gonbidatzeko biderik onena. Gainditu beharreko erronka batzuk gelditzen dira, zeren eta, nahiz eta 2011n nabarmena izan zen Kongresuan bertan borondate politikoa bazegoela, babes hori ez baita oraindik gauzatu berme-politiketan".

Laura Pérezek (Podemos-Ahal Dugu parlamentu-taldea) azpimarratu du ezen “babesgabetasun soziala saihesteko borondate politikoa eta lehentasun ekonomikoak behar direla. Ukitutakoen ondoan jartzea da kontua. Hemendik, estatuko legea aldatzeko gure konpromisoa adierazten dugu”.

Inma Juríok (PSN parlamentu-taldea) eskatu du “sistema publikoak babesteko haiek hausten ari diren politika neoliberaletatik. Arreta unibertsal, integral eta kalitatezkoaren alde gaude. Ezinbestekoa da ganbera honetan onetsitako ebazpena gauzatzea".

Javier Garcíak (PPNko foru parlamentarien elkartea) “bere babes egiazkoena” helarazi du, eta itxaropena “ikerketan eta tratamendu berrietan” jarri du. Esklerosi anizkoitzak ez zaitzatela geraraz zuen eguneroko bizitzan".

Marisa de Simónek (Izquierda-Ezkerrako foru parlamentarien elkarteak) aditzera eman du bere taldea prest dagoela "tratamendu berrietarako eta enplegurako sarbidearen alde lan egiteko", laguntza "koordinatu eta integral baten" baitan, non, aldi berean "ikerketaren arloko inbertsio egokia ere jasoko baita".

El acto, al que también han asistido Maiorga Ramírez, Secretario Primero de la Mesa, y José Luis Mendoza, Consejero de Educación, ha concluido con la emisión de un vídeo (https://www.youtube.com/watch?v=KRv9asFhSYs&feature=youtu.be) y una suelta de globos en los accesos al Parlamento. Ganberako egoitza, gaur gauez, laranjaz argiztatuko da, Esklerosi Anizkoitzaren Mundu Eguna dela gogorarazteko.

Ainhoa Aznárezek adierazi duen bezala, Parlamentuan egindako ekitaldiak balio izan du, halaber, Esklerosi anizkoitza: errealitate baten bi begirada argazki-erakusketa aurkezteko. Atalondoan egonen da ikusgai Sonia Carrascoren lanen erakusketa, maiatzaren 31ra arte.

Nafarroako Esklerosi Anizkoitzaren Elkartea (ADEMNA) irabazi asmorik gabeko entitate bat da, esklerosi anizkoitza eta neuroendekapenezko beste gaixotasun batzuk dituzten pertsonen bizi-kalitatea hobetzeko lanetan diharduena, ikuspuntu integral eta banakatu batekin.

Esklerosi anizkoitza nerbio-sistema zentralaren gaixotasun bat da, bizkarrezur-muinaren eta garunaren nerbio-zuntzak estaltzen dituen substantzia zuria (mielina) modu aldizka kaltetzen duena. Mielina suntsitzen den tokietan, zuntz gogortuko plakak (esklerosia) agertzen dira.