Nafarroako Parlamentuak, Sare elkartearekin eta Hiesaren Aurkako Batzorde Herritarrarekin batera, ekitaldi instituzional bat egin du Hiesaren Aurkako Nazioarteko Eguna ospatzeko. Aurten, Ikusgarritasuna = Duintasuna lelopean, mundua eta GIBaren erantzuna aldatu duten 41 urteko “borroka, erresistentzia eta konkistak” oroitaraztea da xedea, nahiz eta oraindik “minari, diskriminazioari eta heriotzari buruzko istorioekin” lotuta egon.

Hala berretsi du Unai Hualde Parlamentuko lehendakariak, eta “GIBik gabeko belaunaldi bat lortzeko lanean jarraitzearen alde” egin du. Horretarako, “diagnostiko eta tratamendu goiztiarra eta prebentzio konbinatua behar dira. Diskriminazio ezari eta tratu-berdintasunari lotutako tresnez ari gara. Bi alderdi horiek gaixotasun horren berezitasunetara egokitutako arreta soziosanitarioa bermatzeko Gizarte Itunean jasota daude, batez ere emakumeen eta adineko pertsonen kasuan”.

Testuinguru horretan, eta pandemia aurreko mailetara itzuli diren diagnostikoen gorakadari buruz ohartarazi ondoren, Unai Hualdek adierazi du beharrezkoa dela “adi jarraitzea; izan ere, 2012. urtearekin alderatuta egoerak hobera egin duela ikusten bada ere, oraindik ere lana dago GIB/HIESa osasun publikoaren mehatxu gisa 2030. urterako ezabatzeko helburua lortzeko”.

Amaitzeko, Hualdek Sare elkartearen eta Hiesaren aurkako Batzorde Herritarraren lana goraipatu du, eta eskerrak eman dizkie “Nafarroako osasun publikoa hobetzeko egindako ahaleginagatik”. Horrez gain, Mahaiak eta Eledunen Batzarrak azaroaren 24an onartutako adierazpen instituzionala irakurri du.

Jarraian, Araia Villarreal (Hiesaren Aurkako Batzorde Herritarra) eta Irantzu Lópezek (Sare) gogorarazi dute 40 urte eta gero GIBarekin bizi diren pertsonekiko estigma eta diskriminazioak gure gizartean jarraitzen duela, “modu are larriagoan GIBa duten emakumeen kasuan”. Estigma hau da, gainera, ONUSIDAk ezarritako helburua lortzeko oztopo nagusietako bat, alegia, 2030erako GIB/HIESa osasun publikoarentzat mehatxu gisa ezabatzea lortzeko oztopo nagusietako bat.

Horregatik, GIBa eta sexu-transmisiozko beste infekzio batzuk prebenitzeko eta kontrolatzeko Planaren Batzorde Teknikoa sortu eta abian jarri izana oso positibotzat jo ondoren, GIBa bizi duten pertsonen ikusgarritasuna sustatzearen alde egin da, “duintasun-ekintza bat eta diskriminazioa eta estigma murrizteko funtsezko tresna bat delako, eta hori erronka handia da Nafarroan”.

Era berean, Sarek eta Hiesaren aurkako Batzorde Herritarrak kritikatu egin dute 40 urteko borrokaren ondoren, oraindik ere, ondasun eta zerbitzuetarako eskubideak eta irispidea mugatzen dituzten arau, lege eta jardunbideak egotea, hala nola GIBa duten pertsonak ebakuntza kirurgikoetan azken txandara baztertzea, terapia berritzaileen saiakuntza klinikoetatik “ia sistematikoki” baztertzea, edo munduko 56 herrialdek GIBa duten pertsonei mugikortasunerako eskubidea murrizten jarraitzea.

Etorkizunean, batzuek eta besteek prebentzio konbinatuan lanean jarraitzea defendatzen dute, prebentzio-neurriak bermatzen jarraitzea, hala nola diagnostiko goiztiarra, PrEPa hartzea eta prebentzio-materiala doan banatzea. Ildo horretan, baliabideen eskuragarritasunaren garrantzia nabarmentzen dute, bai eta “sexu-hezkuntza publikoa, komunitarioa eta zaintzetan oinarritua” bermatzea ere, sexualitatearen “begirada positibo eta osasungarriarekin”.

“GIBa duten pertsona guztiei bakarrik ez daudela esateko eta gure konpromisoa berritzeko gaude gaur hemen, ikusgarritasun ekintza hauek beharrezkoak izateari uzteko eguna irits dadin. Infekzioa sendatu ezin dugun mundu honetan, gutxienez lor dezagun GIBa dugun pertsona guztiok beldurrik, errurik, lotsarik, arbuiorik eta diskriminaziorik gabe bizitzea”, amaitu dute.