Osasun batzordeak ebazpen bat onetsi du PSNren, Geroa Bairen, EH Bilduren, Podemos-Ahal Duguren eta I-Eren aldeko botoekin eta Navarra Sumaren abstentzioarekin, zeinaren bidez Nafarroako Gobernua premiatzen baita “eremu desberdinetako populazioaren ikerketa xehatua diseina eta gauza dadin, eremu bakoitzeko biztanleek sexu-prestakuntzari eta -hezkuntzari dagokienez zer premia dituzten jakiteko eta langile horien plantillak benetako beharretara egokitzeko, eta sexu-hezkuntzako eta sexologiako berariazko prestakuntza eskatu dadin lanpostu horiek eskuratu ahal izateko”.

Onetsitako ebazpenak bigarren atalean Foru Exekutiboari eskatzen dio “lan-esparruak sexu- eta ugalketa-osasunaren arretarako zentroetatik haratago zabaltzea, Oinarrizko Osasun Laguntzara, sistemaren oinarrian egon daitezen, herritarrei gertutasuna eta sarbidea errazte aldera”.

Era berean, hirugarren atalean, Nafarroako Gobernua premiatzen da “gazteekin eta bereziki gazteei zuzenduriko jarduketak bultzatzea Nafarroako osasun barruti guztietan. Baina bai eta askotan aintzat hartzen ez diren populazio-sektoreei zuzendurikoak ere: desgaitasuna edo bestelakotasun funtzionala duten pertsonak, pertsona migranteak, adinekoak eta abar”.

Azkenik, Foru Exekutiboari eskatzen zaio “Foru agindu baten bidez garatu zen Sexu- eta ugalketa-osasunaren Batzorde Teknikoa berrabiaraztea, tresna egokia baita sexu- eta ugalketa-osasunaren arloko prestazio sanitarioen antolamendua ezartzen duen 103/2016 Foru Dekretuan planteatzen diren gai guztiak garatzeko”.

Zioen azalpenean, PSN, Geroa Bai, Podemos-Ahal Dugu eta I-Ek sustatutako ebazpenak dio osasun-jarduketa bideratu behar dela “bai arriskuak gutxitu eta gaixotasunari aurrea hartzera, bai norberaren zaintza bultzatzera eta sexualitatearen kontzepzio harmoniko, arduratsu eta pozgarria sustatzera, osasunaren osagaietako bat den heinean, modu normalizatuan, estigmarik eta diskriminaziorik gabe”.

Helburu horrekin, eta pertsona guztientzako askatasunean, duintasunean eta berdintasunean oinarrituriko giza eskubideetan oinarritutako sexualitatearen irudia transmititu eta lantzeko, sexu-hezkuntza sustatzearen eta hezitzaileen eginkizuna aitortzearen alde egiten da, sexu- eta ugalketa-osasunaren arloko prestazio sanitarioen antolamendua ezartzen duen 103/2016 Foru Dekretuarekin bat eginez.

Marta Álvarez (Navarra Suma) buru izan duen saioan parte hartu duten parlamentariak izan dira Cristina Ibarrola, Elena Llorente, Ángel Ansa, Raquel Garbayo, Iñaki Iriarte (Navarra Suma), Arantza Biurrun, Ainhoa Unzu, Patricia Fanlo (PSN), Ana Ansa, Isabel Aranburu (Geroa Bai), Bakartxo Ruiz, Patricia Perales (EH Bildu) eta Marisa de Simón (Mixto Izquierda-Ezkerra).

•  www.nafarroakoparlamentua.eus
•  Mozioa (12. NPAO, 2021-02-02koa)