Parlamentuko Osoko Bilkurak, Socialistas de Navarra parlamentu-taldeak, Bildu-k, Aralar-Nabaik, I-Ek eta atxiki gabekoek haren alde eman dituzten botoekin eta UPNren eta PPNren abstentzioekin, Nafarrroan kanabis-erabiltzaileen kolektiboak arautzen dituen Foru Lege proposamena aintzat hartzea onetsi du gaur. HEL bat onesten den lehenengo aldia da; une honetatik aurrera ohiko prozeduraren bidez izapidetuko da.

Proposamena Batzorde Sustatzaile batek bultzatu du Herri Ekimen Legegilea (HEL) erabiltzean eta Nafarroako Ordezkaritza Kannabikoaren (NOK) presidenteak , Fermín Les-k, oholtzan defendatu du. Xedea kanabis-kontsumitzaileen kluben “eraketari, antolamenduari eta funtzionamenduari” buruzko arau orokorrak ezartzea. Irabazi asmorik gabeko elkarte diren aldetik, Elkartzeko Eskubidea arautzen duen 1/2002 Lege Organikoan ezarritakoa aplikatuko zaie.

Lege-araubide horretan, “segurtasun juridikoa” emanen duen esparru bat bilatu nahi da, bai “kontsumoari dagokionez”, bai “autohornikuntzari dagokionez”. Izan ere, jurisprudentziaren arabera, “kanabisaren kontsumoa ez da arau-hauste penal edo administratiboa izanen, baldin eta jurisprudentziak interpretatutako mugak betetzen baditu eta errealitate soziala kontuan hartzen bada”.

Beraz, “bai bere izaera ludikoan, bai gaitz jakin batzuetarako dauzkan eragin aringarriengatik” “Nafarroan gaur egun gehien kontsumitutako substantzietako bat denez gero”, foru lege proposamenak klubei dei egiten die kanabisaren erabilera arduratsua egin dezaten arriskuak aurreikusten, kontsumoa kontrolatzen edo legez kontrako merkatua murrizten.

Kluben eraketari dagokionez, klub bakoitzak kideen erregistro bat sortu beharko du. Kideek adinez nagusiak izan beharko dute beti eta klubean sartu aurretik kanabis kontsumitzaileak direla frogatu beharko dute.

Kidetutako pertsonek ezingo dute elkarteak, arriskuak aurreikusteko neurriak eta nazioarteko estandarrak kontuan hartuta, egunean kanabisa kontsumitzeko ezartzen duen kantitatea baino gehiago hartu.

Bestalde, kanabis-kontsumitzaileen klubek beraiek elkartzeko entitateak sortzen ahalko dituzte, interes komunak lortzeko nahiz administrazio publikoen eta gizarte osoaren aurrean haien ordezkari gisa jarduteko.
Azkenik, xedatzen da ezen, toki entitateek, beren eskumenak baliatuta, egoki jotzen dituzten baldintzak ezarri ahalko dituztela, kanabis-kontsumitzaileen kluben jardunera bideratutako lokalak irekitzeari buruzkoak.

Nafarroako kanabis-kontsumitzaileen kolektiboak arautzen dituen HELa Nafarroako Parlamentura iritsi da 5.114 sinaduraren babespean, iragan uztailaren 28an Hautesle Erroldaren Bulegoaren Zuzendariordetza Nagusiak eman zuen agirian jasotzen denez. Aurkeztu ziren 5.311 sinaduretatik 197 egiaztatu ez baziren ere, HELak aurkeztu zen unean indarrean zegoen erkidego-erroldaren hautesleen ehuneko bata baino handiago zen; betebehar hori beharrezkoa da izapidetzearekin aurrera egiteko.

2013ko martxoaren 14an arku parlamentariotik kanpoko pertsona batek Herri Ekimen Legegile (HEL) bat Osoko Bilkuran aurkezteko aukera izan zuen lehen aldiz; kasu horretan Nafarroako klinikek abortua edo haurdunaldiaren borondatezko etetea egin dezaten saihesteko. Bazter geratu zen.

• www.parlamentodenavarra.es
• Foru Lege proposamenaren argitalpena (NPAO, 97. zk., 2014-09-11koa)