Parlamentuko Osoko Bilkurak, SNk, Bildu-k, Nabai-k, I-Ek eta atxiki gabeko parlamentariek haren alde emandako botoekin eta UPNren eta PPNren abstentzioarekin, ebazpen bat onetsi du gaur zeinaren bidez Espainiako Gobernua premiatzen den “agin dezan hipoteka-betearazpenak berehala etetea, horiek jabeak etxebizitzarik gabe eta etxebizitzarako eskubidea ziurtatzeko baliabiderik gabe uztea dakarten guztietan”.
 

Onetsitako ebazpenak bigarren puntu bat du non, halaber, Nafarroako Gobernua premiatzen den “berehala geldiaraz ditzan gertatzen ari daitezkeen babes ofizialeko edozein modalitatetako etxebizitzen etxegabetzeak. Era berean, premiatzen du balia ditzan lehentasunez erosteko eta atzera eskuratzeko eskubideak babes ofizialeko etxebizitzetan, hirugarren batek hipoteka-betearazpen prozedura bat abian jartzen duenean”.

Era berean eta hirugarren atal batean, Nafarroako Gobernua premiatzen da “hitzarmen bat sina dezan edonolako hitzarmen finantzarioa duen banku eta aurrezki kutxekin, entitate horiek etxegabetzeak berehala eteteko helburuarekin”.
 

Zehazten denez, hitzarmen horretan “honako neurriok jasoko dira: orain arte gauzatutako etxegabetzeak berrikustea eta, ondorioz, etxebizitza itzultzea etxerik edota beste etxe bat eskuratzeko baliabiderik ez duten pertsona edo familia etxegabetuei; entitate finantzarioek konpromisoa hartzea, hipoteka-betearazpen prozedura bat abian jarri aurretik Nasuvinsa sozietate publikoaren esku utz dezaten horien erabilera eta okupazioa kudea dezan alokairu sozialaren bidez. Hala, ukituek ez dute etxetik atera beharko eta alokairu sozial bat ordaintzeko konpromisoa hartuko dute (alokairu horren kopurua familiaren erosahalmenaren arabera ezarriko litzateke, eta ez luke ezein kasutan izan beharko familiaren diru-sarreren % 15 baino handiagoa); arrazoi objektiboak desagertu eta familiak lehenengo egoerara itzulitakoan, alokairua ordaintzeari utzi eta berriro hipoteka ordaintzen hasiko lirateke (betiere, etxebizitzarako eskubidearen edukitzaileak hala nahi izanez gero)”.
 

Azkenik, Nafarroako Gobernua premiatzen da “harreman ekonomikoak bertan behera utz ditzan aurreko idatz-zatian jasotako hitzarmena sinatzen ez duten eta etxegabetzeak gauzatzen dituzten entitate finantzarioekin”.
 

Onetsitako ebazpenak beste hiru puntu jasotzen ditu, Aralar-Nabai parlamentu-taldeak in voce aurkeztutako eta Bildu-k, ekimenaren titularra denak, onetsitako gehitze zuzenketa baten ondorioz gehitu dena. Denek haren alde bozkatu dute, UPNk eta PPNk salbu, ez baitute bozkatu.

Alde batetik, Parlamentuak “bere babesa adierazten dio Hipotekak Ukitutakoen Plataformek bultzatutako eta, sinadura bidez, Nafarroako biztanle ugari atxiki zaizkion Legegintzako Herri Ekimenari”:
Bestalde, Nafarroako Gobernua premiatzen da “zergen eta Nafarroako bestelako eskumenen alorrean ordainean ematea hipotekak dituzten etxebizitzen jabeen betebeharrak kitatzeko neurri gisa erregulatzea sustatzera”.
 

Gainera, Nafarroako Gobernuari dei egiten zaio “VINSAn alokatutakoen etxegabetze kasuetan, dagoeneko ematen ari direnak, konponbide bat aztertzera”. UPNk ez du bozkatu.

Socialistas de Navarra parlamentu-taldeak hala eskatuta, azken idatz-zati bat gehitu da, zeinak banku-entitateak behartzen dituen “stockean dituzten etxebizitzen % 50a alokairu sozialera bideratzera; etxegabetuek bost urtez erabiliko lituzketenak. Entitate horiek Bankuen Berregituraketa Ordenatua egiteko Funtsaren laguntzak jaso dituzten kasuetan, haien etxebizitza stockaren % 60ra igoko litzateke”. Denek haren alde bozkatu dute, UPNk eta PPNk salbu, ez baitute bozkatu.

Zioen azalpenean, Bildu-k bultzatutako ebazpenak ekimena “zordun hipotekarioen arazoa konpontzeko” orduan Nafarroako entitateak lehenengo ilaran kokatzeko beharrean babesten du. Izan ere, Estatua gobernatzen duen alderdiak “ez du borondate politikorik ez ideologikorik” eta herritar guztien “etxebizitzarako eskubidea bermatze aldera egindako erreforma urriek argi uzten dute zeintzuk diren bere lehentasunak”.

· www.parlamento-navarra.es
· Mozioaren argitalpena (NPAO, 110. zk., 2012-12-18koa)