Parlamentuaren Osoko Bilkurak 3.657.469,68 euroko kreditu-gehigarria eta 127.260 euroko kreditu berezia ematen dituen Foru Legea onetsi du gaur, PSN, EH Bildu, Geroa Bai, PPN eta Zurekin taldeen aldeko botoarekin, UPNren eta atxiki gabeko parlamentariaren abstentzioekin, eta Talde Mistoaren aurkako botoarekin. Helburua Eskubide Sozialetako, Ekonomia Sozialeko eta Enpleguko Departamentuaren, Unibertsitateko, Berrikuntzako eta Eraldaketa Digitaleko Departamentuaren, Hezkuntza Departamentuaren, eta Kultura, Kirol eta Turismo Departamentuaren finantzaketa-beharrei erantzutea da.

Eskubide Sozialetako, Ekonomia Sozialeko eta Enpleguko Departamentuaren beharrak finantzatzeko kreditu-gehigarriaren zenbatekoa Fundación Navarra para la Gestión de Servicios Sociales Públicos-Gizain Fundazioa aurrekontuko partidari (2.187.469,68 euro) aplikatuko zaio. Kontu korronteetako interesak eta eperako ezarpenak partidan dagoen kredituaren (2.187.469,68 euro) kargura finantzatuko da.

Aipatu partida handitu izanaren xedea da babes-sisteman hartutako adingabeei zerbitzuak ematearen ondoriozko betebeharrak estaltzea. Zehazki, gazte-justiziako eguneko zentroarenak, Beloso, Barañain, Orvina, Etxegara eta Argaraiko adingabeentzako behaketa eta harrera zentroenak, Concepcion Benítez behin-behineko zentroarenak, eta urgentziazko harrera familietan dauden adingabeen balorazio integrala egiteko programarenak.

Unibertsitateko, Berrikuntzako eta Eraldaketa Digitaleko Departamentuaren beharrak finantzatzeko kreditu-gehigarriaren zenbatekoa honako aurrekontuko partida hauei aplikatuko zaie: BAI Fundazioa: eraikuntzan eta arkitekturan robotika eta industrializazioa garatzea (270.000 euro), eta CENER fundazioari funts-ekarpena I+G+B proiektuetarako eta inbertsioetarako (1.200.000 euro). Zehazki, Diruzaintzako geldikina (270.000 euro) eta Eskualdez gaindiko lankidetzarako proiektu eta jarduketetarako dirulaguntzak (1.200.000) partidetan eskura dagoen saldoaren kargura lortuko da finantzaketa.

Bi partida horiek handituta, erantzuna eman nahi zaie Eraikuntzaren eta Arkitekturaren Industrializazioko eta Robotikako Erreferentziazko Zentro Nazionala / Building & Architecture Institute (BAI) institutua definitzeko jarduerak garatzeko betebeharrei. Era berean, CENER fundazioak I+G+B egitasmoen sustapenean dituen betebeharrei ere erantzun nahi zaie.

Hezkuntza Departamentuaren eta Kultura, Kirol eta Turismo Departamentuaren eskakizunei erantzuteko aparteko kreditua (127.260 euro) honako aurrekontuko partidei aplikatuko zaie: Leitzako Udalarekin hitzarmena hezkuntza azpiegituretan inbertsioak egiteko (37.260 euro) eta Aitziber Urdiango Gaztedia elkartearekin hitzarmena igerilekua berritzeko (90.000 euro). Aurretik aipatutako partida berberen kontura lortuko da finantzaketa.

Nafarroako Ogasun Publikoari buruzko apirilaren 4ko 13/2007 Foru Legearen 4. artikuluak ezartzen duenez, Foru Lege bidez arautuko dira Nafarroako aurrekontu orokorrak, bai eta aparteko kredituak edo kreditu-gehigarriak emateko aurrekontu orokorretan egiten diren aldaketak ere. Horrenbestez, gastu-aurrekontuan esleitutako kreditua nahikoa ez denez, 48. artikuluarekin bat etorriz, egokia da honako Lege honen onarpena, kasu honetan irakurraldi bakarrez. Legea Nafarroako Aldizkari Ofizialean argitaratu eta hurrengo egunean sartuko da indarrean.

• www.parlamentodenavarra.es/eu
• Foru Legearen Proiektuaren argitalpena (NPAO, 82. zk., 2024-06-24)
• Bideotekako irudiak