Carmen Maeztu Nafarroako Gobernuko Eskubide Sozialetako kontseilariak ostegun honetan adierazi duenez, Foru Gobernuak enplegu politika aktiboen inguruan legegintzaldiko akordio programatikoan aurreikusitako "neurri guztiak" bete ditu, eta "birdefinitutako eta pertsonen eta enpresen beharretara bideratutako" esparru estrategiko bat martxan jarri dela nabarmendu du.

Parlamentuaren Osoko Bilkuran PSNk egindako interpelazioari erantzunez, Maeztuk gogorarazi du legegintzaldi honetan 2021-2024 Enplegu Politika Aktiboen Plana onartu dela, eta gauzatze maila dagoeneko % 90era hurbiltzen ari dela.

"Lan handia egin da legegintzaldi honetan Nafarroako Lansarek Nafarroako enplegu-sisteman duen lidergoa sendotu zezan, eta, neurri batean, lortu dugu. Enplegu-politika aktiboen sistema indartzea lortu da, herritarrak zerbitzu guztietara iristea sustatu da, enpresa-sektoreekiko hurbilketa eta esku-hartze bateratua bultzatu da, plangintza optimizatu da eta ebaluazio-politiketan aurrera egin dugu", esan du kontseilariak.

Carmen Maeztuk adierazi duenez, "gure helburua da eta izango da kalitatezko enplegu gehiago sortzen laguntzea eta pertsonen enplegagarritasuna hobetzea, betiere arreta jarriz zailtasun gehien dituzten pertsonengan, zaurgarrienengan".

Kontseilariak adierazi duenez, helburu horrek aurrekontu-babesa izan du; izan ere, "2019an 44,6 milioiko hasierako aurrekontutik abiatu ginen, eta 2023an 64,5 milioi izan genituen (Europako funtsak barne)".

Nuria Medinak (PSN) enplegu politika aktiboen garrantzia azpimarratu du eta "profil profesionalak lan merkatuaren eskaeretara egokitzea" ezinbestekoa dela adierazi du. Medinaren ustez, "administrazioak, enpresek eta gizarteak batera lan egitea ezinbestekoa da. Enplegu-politika aktiboek gizarte-babeseko sistemarekin koordinatuta jardun behar dute. Enplegu-politika aktiboak ezinbesteko tresna ditugu gure lan-merkatua modernizatzeko, aukerak sortzeko eta aukera horiek pertsona guztiengana iristeko", esan du.

Maribel Garcia Malok (Navarra Suma) adierazi duenez, PSNk "oso egun txarra aukeratu du enplegu politiken triunfalismoa egiteko, ostegun honetan argitaratu den Biztanleria Aktiboaren Inkestak gauzak bere lekuan jarri dituelako. Berriz ere bi digituko langabezia-tasa dugu -% 10,09-. Erkidego honetan ohituta geunden enplegu-tasarik onenen buru izatera, eta une honetan seigarren erkidegoa gara. Legegintzaldi honetako langabeziaren hazkundearen buru gara", kritikatu du.

Isabel Aranburuk (Geroa Bai) Nafarroak enpleguaren arloko eskumen osoak bere gain hartzearen alde egin du bere hitzaldian, "zehazki, Gizarte Segurantzaren kudeaketa", eta argudiatu du "politiken eraginkortasuna lurraldearen beharretara egokitzean" datzala. Hori dela eta, "Gizarte Segurantzako Ministerioak enplegu-politika aktiboen esparruan beste zentralizazio saiakera batzuk egitea" errefusatu du, "autonomia-erkidegoetan erregulazio eta egituraketa jakin bat ezartzeko".

Arantxa Izurdiagak (EH Bildu) bat egin du Enplegu Politika Aktiboen Planaren ikuspegiarekin, eta positibotzat jo du "gauzatze tekniko maila handia" izatea, baina adierazi du "eztabaidaezina" dela "oraindik gai asko jorratu behar direla eta etengabeko hausnarketa merezi dutela".

Mikel Builek (Podemos-Ahal Dugu) aitortu duenez, "zaila da enplegu-politika aktiboen emaitzak jakitea, ez baitakigu zer gertatuko litzatekeen egingo ez bagenitu, baina gaur egun enpleguari buruzko datuak, hamarkada batean hiru krisi izan ondoren, hor daude. Datu okerragoak ezagutu ditugu", ziurtatu du.

Marisa de Simónek (Izquierda-Ezkerra) adierazi duenez, "departamentua enplegu-politika aktibo zuzenak egiten ari da; izan ere, 2023ko aurrekontuetan isla argia dute, ez da kea, politikek finantzaketa bermatua baitute". "Hala ere, gehiago behar da, enplegua lortzea sustatzeko jarduera gehiago behar dira", planteatu du.