Parlamentuko Osoko Bilkurak onetsi du gaur Navarra Sumaren aurkako botoarekin eta PSN, Geroa Bai, EH Bildu, Podemos-Ahal Dugu eta I-Eren aldekoekin, erlijioaren irakaskuntzari eta haren ordezkoei buruzko Foru Lege proposamena aintzat hartzea.

Izquierda Ezkerrak aurkeztutako Lege proposamenaren helburua da erlijioko irakasgaia eta haren ordezkoak estatu-mailako oinarrizko araudian ezarritako aginduzko gutxieneko eskola-zamara murriztea (bi ordu izatetik ordu batera).

Zioen azalpenean azaltzen zenez, Hezkuntzaren Kalitatea Hobetzeari buruzko abenduaren 9ko 8/2013 Lege Organikoak egin zizkion aldaketen ondoren, Hezkuntzari buruzko maiatzaren 3ko 2/2006 Lege Organikoak xedatzen zuela -18. artikuluan, Lehen Hezkuntzarako; 24. eta 25. artikuluetan, Derrigorrezko Bigarren Hezkuntzarako, eta 34. bis eta ter artikuluetan, Batxilergorako– erlijioa hezkuntza-maila horietako berariazko irakasgaien artean irakatsiko dela; bigarren xedapen gehigarriaren arabera, “eskaintza hori ikastetxeentzat nahitaezkoa eta ikasleentzat borondatezkoa izanen da, erlijio katolikoaren kasuan”.

Aipatzen da arau horiek garatzea eta aplikatzea eta irakastorduak ezartzea autonomia erkidegoei dagokiela; Nafarroako Foru Komunitatearen kasuan, Nafarroako Foru Eraentza Berrezarri eta Hobetzeari buruzko abuztuaren 10eko 13/1982 Lege Organikoaren 47. artikuluak aitortzen dizkion eskumenak baliatuz.

Ez da erlijioko irakasgaia murrizteko saiakera egiten den lehen aldia. 2018ko ekainaren 21ean, orduan irakurketa bakarrean, Parlamentuko Osoko Bilkurak atzera bota zuen EH Bilduk, Podemos-Ahal Duguk eta Izquierda-Ezkerrak sustatutako ekimena. Kasu hartan, PSNren babesa ez zen nahikoa izan UPNren, PPNren eta Geroa Bairen aurkako botoak gainditzeko.

Behin aintzat hartzea onetsita, Foru Lege proposamena Batzordean eztabaidatuko da Osoko Bilkuran berriz ere eztabaidatu eta bozkatu aurretik.

• www.parlamentodenavarra.es

• Foru Lege Proposamena (18. NPAO, 2019-09-27koa)