Parlamentuko Osoko Bilkurak ebazpen bat onetsi du gaur Geroa Bai, EH Bildu, Podemos-Ahal Dugu-Orain Bai (3), PSN eta I-Eren aldeko botoekin, UPN eta PPNren aurkakoekin eta podemos-Ahal Dugu-Orain Bairen (4) abstentzioarekin, zeinaren bidez Ganberak “beharrezkotzat jotzen baitu garai politiko berri bat irekitzea, zeinetan gaindituko den azken urteotako atzerakada demokratikoa, eta Estatuko Gobernua premiatzen du lehentasunez ekin diezaien arazo sozialei, azken hilabeteotan herritarrak era masiboan manifestatzera behin eta berriz bultzatu dituzten horiei (pentsioak, soldata-arraila, genero-indarkeria), horrenbestez agenda sozial berri bat ezarriz”.

Onetsitako ebazpenak bigarren atalean, Estatuko Gobernua premiatzen du “Foru Parlamentuak eta Nafarroako Gobernuak sustatutako izaera desberdineko legegintzako ekimenak eta erabakiak (sozialak, hezkuntzakoak, osasungintzakoak, ekonomikoak…) errespeta ditzan”. Atal honek aurrera egin du Geroa Bai, EH Bildu, Podemos-Ahal Dugu-Orain Bai eta I-Eren aldeko botoekin, PSNren abstentzioarekin eta UPN eta PPNren aurkakoekin.

Era berean, hirugarren atalean “Nafarroako Parlamentuak Estatuko Gobernua eta Nafarroako Gobernua premiatzen ditu berehala has ditzaten elkarrizketak, Foru Komunitateak bere gain hartze aldera Estatuak oraindik eskualdatu ez dizkion eskumenak, lan-egutegi bat ezarrita 6 hilabeteko epean gauzatzekoa, eta lehentasuneko tokia emanez I+G+b, trafiko zein espetxe arloetakoei”. Puntu hau eta hurrengoa UPN eta PPNren aurkako botoekin eta gainerakoen aldekoekin onetsi da.

Azkenik, Nafarroako Parlamentuak premiatzen du “Estatuko eta Nafarroako erakundeen artean irekiko diren harremanen garai berrian ekidin dadin Konstituzio Auzitegiari sistematikoki errekurtsoak aurkeztea Legebiltzar honetan onetsitako arauen aurka, eta berrikus daitezen lehenagotik aurkeztutako errekurtsoek sorrarazitako disfuntzioak, halako moduz non arazo horiei helduko zaien elkarrizketatik eta eskumen-gatazken negoziaketatik, gai horiek bide judizialetik ateraz, ahal den neurrian”.

Geroa Bai, EH Bildu, Podemos-Ahal Dugu-Orain Bai eta I-Eren eskariak ez du aurrera egin, berehala hasi beharreko elkarrizketetan datozen bost urtetarako hitzarmen ekonomikoaren negoziazioa eta lan osasunaren eskumena sartzekoa, hain zuzen ere, PPNk in voce zuzenketaren tramitazioari uko egin baitio (erregelamenduak inork uko ez egitea exijitzen du).

Zioen azalpenean, Geroa Bai talde parlamentarioak aurkeztutako (eta Eh Bildu eta I-Ek zuzendutako) ebazpenak adierazten du Nafarroaren eta Estatuaren arteko harreman instituzionalean “ikuspegi zentralista bat nagusitu dela, eta Nafarroatik sortutako legegintza-ekimenen aurrean gatazka eta judizializazioa ohikoak izan direla”, “Gurtel auzia” dela eta aurkeztutako zentsura mozioak Mariano Rajoy Gobernutik bota zuten arte.

Zentzu horretan, PSOEren Gobernua eratzea posible egin zuten “sostengu anitzak” aipatzen dira, tartean Unidos Podemos, EAJ-PNV eta EH Bildu, eta horiek guztiek Nafarroako ganberan ordezkaritza izanik, elkarrizketa eta elkar ulertze zikli berri baten irekiera eskatzen da.

• www.parlamentodenavarra.es

• Mozioa (105. NPAO, 2018-09-07)