Parlamentuko Osoko Bilkurak erabaki bat onetsi du gaur, Espainiako Gobernua premiatzen duena “Europar Batasunaren Zerbitzu Digitaletako Erregelamendua (DSA) berehala ezar dezan”. Horren alde bozkatu dute UPNk, PSNk, EH Bilduk, Geroa Baik, PPNk eta Contigo-Zurekinek, eta kontra, berriz, Voxek.

Ezarpen horrekin batera, adierazten denez, “plataformek gazteen datuak monetizatzeko eta haien arreta erakartzeko –zaurgarritasunez aprobetxatuta– erabiltzen dituzten teknikak detektatu beharko dira, eta haiei aurre egin, Zerbitzu Digitaletako Europako Erregelamendua (DSA) betetzeko”.

Horrez gainera, “administrazio publikoek jardunbide egokiak sustatu beharko dituzte, hala nola jakinarazpenak desaktibatzea, mugikorraren blokeo automatikoa, gomendio kronologikoak egiteko sistemak eta pantaila grisen eskalan jartzeko aukera kontsumo denbora murrizteko”.

Azkenik, “Merkatuen eta Lehiaren Batzorde Nazionalaren (MLBN) estatutuak berregin beharko dira, Espainian zerbitzu digitalak koordinatzen dituen erakundea baita, kontrolatzeko eta gainbegiratzeko eskumenak izan ditzan, Zerbitzu Digitalen Erregelamenduak (DSA) eskatzen duenarekin bat”.

Onetsi den erabakiaren bigarren puntuan, halaber, Nafarroako Gobernua premiatzen dute “familientzako prestakuntza eta alfabetatze digitaleko jarduketak diseinatu ditzan, eta gerora ezarri eta ebaluatu ditzan, haurren, nerabeen eta gazteen parte hartzea barnean hartuta, helduen prestakuntzan inplikatuta baitaude ere bai”.

Foru Legebiltzarrari egiten zaion eskaera da “martxan jar ditzala helduentzako eta familientzako prestakuntza eta alfabetatze digitaleko programak, haurrek, nerabeek eta gazteek sare sozialetan egiten duten erabileraren eta arriskuen nahiz onuren inguruan duten ezagutza eta ulertzeko gaitasuna areagotzeko”.

Halaber, bere gain hartu beharko du “mugikorren erabilera arduratsua eta gainbegiratua sustatzea, eta horretarako gurasoen kontroleko tresnak indartu beharko ditu, adingabeen babesa bermatzeko eta eduki desegokietara sar daitezela saihesteko”.

Azkenik, defendatzen da “Hezkuntza berrikuntza eta eraldaketa digitaleko baliabideen zentroa sortzeko behin betiko bultzada eman behar dela, hau da, komunitate osoaren hezkuntza berrikuntzako premiak artatzeko eta sustapeneko egitura autonomo bat”. Geroa Baik eskatuta gehitu da epigrafe hori, egin duten gehitzeko zuzenketa PSNk, EH Bilduk, Geroa Baik, PPNk eta Contigo-Zurekinek babestu baitute. UPN abstenitu da eta Vox horren aurka agertu da.

Zioen azalpenean, PSN talde parlamentarioak sustatu duen erabakiak ezagutzera ematen du hazkunde nabarmena egon dela pandemiaz geroztik 15 eta 24 urte arteko gazteek sentitzen duten ondoez emozionalean, Osasun Publikoaren eta Lan Osasunaren Institutuak egiaztatzen duenarekin bat, eta adierazten du arazoaren jatorria dela “gailu elektronikoak gaizki erabiltzen dituztela”; izan ere, OMEk jadanik ohartarazi du horrek osasun mentalean duen eraginaren inguruan, baina, hala ere, “oraindik ere ez du katalogatzen internetarekiko, mugikorrarekiko eta sare sozialekiko adikzioaren nahasmendu gisa”.

• www.parlamentodenavarra.es
• Publicación de la moción (BOPN, nº 123, de 29-10-2024)