Iruñeko Orfeoiaren, Txistularien elkartearen eta Ortzadar taldearen kontzertuarekin, Nafarroako Parlamentuak amaiera eman dio gaur arratsaldean 2023ko Nafarroaren Egunaren harira antolatutako ekitaldien programari, kasu honetan Gamazada (1893-94) bezalako gertakari historiko garrantzitsu bat gogora ekarriz.

Ekitaldia Unai Hualde lehendakariaren hasierako agurrarekin hasi da eta jarraian aipatutako hiru taldeek kontzertu-ikuskizuna eskaini dute. Ganberaren egoitzaren atalondoan berrehun pertsona bildu dira, hautetsien eta gizarte zibileko hainbat erakunde, elkarte eta taldetako ordezkarien artean.

Nafarroako ereserkia interpretatu ondoren bertaratutakoei zuzendu dien hitzaldian, Unai Hualdek aurten aukeratutako ikuskizunaren testuingurua azaldu du, Nafarroaren Egunean ohikoa den bezala, "gure historiako hainbat une gogora ekartzeko, gure egungo errealitate batzuk azaltzen dituzten iraganeko pasarteak, alegia. Nafarroako Gorte zaharrekin, demokraziaren garaiko lehen Foru Parlamentuarekin, Kontuen Ganberaren berrezarpenarekin, egoitza horren inaugurazioarekin eta Lorafnaren 40. urteurrenarekin egin genuen. Gaur Gamazada gogoratzen dugu", zehaztu du.

Ildo horretan, presidenteak "gure Foruak defendatzeko gertakari" hura balioetsi du, hori baita gaur egun "Legebiltzar honetan erabakitzen jarraitzeko aukera ematen diguna, laster ekingo baitio 2024rako zerga-neurriei buruzko lege-proiektuaren eztabaidari. Gamazo Ogasun ministroa, Nafarroari erregimen komuna aplikatzeko baliogabetzen saiatu zen autonomia fiskal horrek ahalbidetzen digu hemendik gurea dena erabakitzen jarraitzea. Herritarren mobilizazio baketsuak gure foru erregimenaren aurkako eraso hura zapuztu zuen. Autogobernua da, ez dira pribilegioak", esan nahi izan du.

Unai Hualdek, azkenik, musika-ikuskizunaz gozatzeko gonbidapena luzatu du: "pieza guztiek dute zentzua eta esanahia gaur gogora ekarri dugun testuinguru historikoan, Gamazadaren 130. urteurrenean. Gozatu errepertorioaz. Eskerrik asko".

Ondoren, lehendakariak Orfeoiko, Txistulari elkarteko eta Ortzadarreko zuzendariei Nafarroako Gorte zaharretako hiru hautestontzien zilarrezko erreprodukzio eman dizkie. José Daniel Sánchez, Orfeoiko Lehendakariak, Xabier Olazabal, Txistularien Elkarteko Idazkariak, eta Nekane Santos eta Ainara Yeregui, Ortzadar Euskal Folklore Elkarteko ordezkariek jaso dituzte eta opari bana eman diote lehendakariari.

Jarraian, ikuskizun-kontzertua eskaini da hiru taldeen eskutik.