Unai Hualde Nafarroako Parlamentuko lehendakariak Marian Pérez Lamana eta Jose Luis Esarte, Gamazadaren 130. urteurrena ospatzeko helburua duen ekimenaren ordezkariak hartu ditu gaur bere bulego ofizialean.

Bilera horretan, Jose Luis Esartek lehendakariari helarazi dio Nafarroan 1893 eta 1894 bitartean izandako herri-erreakzioa gogoratzea “beharrezkoa” dela, Sagastaren Alderdi Liberalaren Gobernuko Ogasun ministro German Gamazok 1841eko Lege Itunduaren bidez ezarritako Nafarroako zerga-erregimena ezabatu nahi izan zuenean egindakoa, alegia.

Horretarako, ekimenaren ordezkariek Parlamentuaren eta Nafarroako erakundeen lankidetza nahi dute, Gamazadaren 130. urteurrena ospatzeko balioko duen programa bat gauzatzeko. Bertan, erakusketa ibiltari bat, hitzaldiak eta foruen estatuaren aurrean mobilizazio bat egitea aurreikusten da, zeina “1903an herri ekimenez eta Nafarroako askatasunaren sinbolo gisa” eraiki zen.

Era berean, ekimenak Iruñeko Orfeoia eta Donostiako Orfeoia bildu nahi ditu, 1893ko ekainaren 4ko manifestazioa, Nafarroan orain arte ezagutu den manifestaziorik handiena amaitu ondoren Iruñeko Orfeoiak abestu zuen Gernikako Arbola, protesta haren “ereserkia”, interpreta dezaten.

“Beharrezkoa da oroitzea eta, batez ere, ezagutzera ematea Nafarroako herriak eta bere erakundeek egindako mobilizazio izugarria, alderdi politiko guztiek aho batez bat egin baitzuten mobilizazioarekin. Nafarren Ohorezko Liburuan 120.000 sinadura baino gehiago bildu ziren protestarekin bat eginez – 300.000 biztanle inguru zituen Nafarroan”, gehitu du Esartek.

Unai Hualdek, bere aldetik, azpimarratu du oso garrantzitsua dela erakundeetatik horrelako ekimen herrikoiak laguntzea, “belaunaldi berriek nondik gatozen jakin dezaten eta, gure historiaren une erabakigarrietan, gamazada kasu, gure arbasoek Nafarroaren defentsan behar bezala egoten jakin zutela azpimarratzeko”.