Parlamentuaren Osoko Bilkurak gaur onetsi du, PSN, Geroa Bai, EH Bildu, Podemos-Ahal Dugu eta I-Ek emandako aldeko botoarekin eta Navarra Sumaren abstentzioarekin, aintzat hartzea Gardentasunari, informazio publikoa eskuratzeari eta gobernu onari buruzko 17ko 5/2018 Foru Legea aldatzen duen Foru Lege proposamena.

Irakurketa bakarrean izapidetuta, EH Bilduk sustatu duen lege proposamenak xede du tresna zehatz bat jasotzea Gobernu Irekiaren Atarian, sei hilabeteko epean, “Europako funtsen bidez finantzatutako proiektuen deialdiaren, esleipenaren eta ezarpenaren prozesuan informazio publikoaren kontrola eta gardentasuna hobetu” ahal izatea berariaz ahalbidetuko duena.

Horretarako, Gardentasunaren Atarian atal berezi bat gaituko da, Europako suspertze funtsen kudeaketarako publizitate aktiboa izenekoa, Europako Lurraldeak eta Kohesioa Berreskuratzeko Laguntzaren (REACT-EU) –47.500 milioi– eta Suspertze, Eraldatze eta Erresilientzia Planaren –672.500 milioi, Next Generation funtsen osagai nagusia– kudeaketarekin lotutako informazio guztia bilduko duena. Atal horretan zentralizatuko da transferentziak bideratzen dituzten departamentu, erakunde autonomo eta enpresa publikoen informazioa.

Argitaratutako informazioen osotasuna eta eskuragarritasuna bermatzeko, (onespenaren ondoren gehienez ere hilabeteko epean) funtsen kudeaketari buruzko mapa ulergarri bat egitea aurreikusten da. Dokumentazio hori, gainera, formatu digitalean eskuragarri egon beharko litzateke sinatzen denetik gehienez ere hilabeteko epean (kontratuak, hitzarmenak eta dirulaguntzak). Funtsen aurrekontu-exekuzioarekin zerikusia duten datuak hiru hilean behin gaurkotuko lirateke.

Eraginkortasunari edo efizientziari begira beharrezkoa balitz, kasuan kasuko neurriak hartuko lirateke publizitate instituzionalaren edota komunikazio publikoaren arloan.

Bestalde, Nafarroako Gardentasunaren Kontseiluari behar dituen baliabideak ematea aurreikusten da, Europako funtsen kudeaketaren arloan gerta litezkeen erreklamazioak behar bezala gauzatzeko.

• www.parlamentodenavarra.es

• Foru lege proposamena (71. NPAO, 2021-05-28koa)