Parlamentuaren osoko bilkurak mozio bat baztertu du gaur PSNren, EH Bilduren, Geroa Bairen eta Contigo-Zurekinen aurkako botoekin eta UPNren, PPNren eta Voxen aldeko botoekin, zeinaren bidez proposatzen zen Ganberak “babesa adieraztea foru-erkidegoko nekazarien eta abeltzainen erreibindikazioei”.

Baztertutako mozioak bigarren atalean Nafarroako Gobernuari eskatzen zion “lehen sektorearen izaera estrategikoa blinda dezan Nafarroako Foru Komunitatean”.

Era berean, hirugarren atalean, Nafarroako Gobernua premiatzen zen “sektorearen beharrizanak bilduko dituen talka-plan bat taxutu dezan, nekazaritzako organizazio guztiekin hitz eginda”.

Azkenik, Foru Exekutiboa premiatzen zen “Nafarroako Foru Komunitatean jarduten den sektore primarioaren fiskalitatea egokitu dezan, egiten duten lana ekonomikoki bideragarria izan dakien eta inguruko beste erkidego batzuetako nekazariak eta abeltzainak bezain lehiakorrak izan daitezen”.

Zioen azalpenean, PPN talde parlamentarioak sustatutako mozioak lehen sektorearen "protestak" nekazaritza- eta abeltzaintza-jardunbideen "modernizazioa" erraztuko duten politikak sustatzeko beharrarekin erlazionatzen ditu, "lehiakortasuna eta hazkunde jasangarria bermatuko dituen fiskalitatearen" eskutik.

Testuinguru horretan, eta Administrazio Publikoekin arrazoizko akordio bat lortze aldera, despopulazioaren aurkako borrokari eta ohituren zaintzari dagokienez ere, "zerga-erregulazioak malgutzearen beharra" azpimarratu da, inbertsioarekin eta berrikuntzarekin duten loturagatik, bai eta "administrazio-izapideak sinplifikatzearen beharra" ere.

Proposamena egin duenak, amaitzeko, sektoreari beharrezko tresnak emateko deia egin du, beste autonomia-erkidego batzuekiko "desabantailan" baitago une honetan, eta horren bideragarritasunak "elikagaien segurtasuna eta gure lurrarekiko lotura sendotzea" ekarriko baitu.

• www.nafarroakoparlamentua.eus
• Mozioa (43. NPAO, 2024-03-19koa)