Legebiltzarraren Osoko Bilkurak mozio bat baztertu du gaur, UPN, PSN, Geroa Bai, PPN, Talde Mistoaren eta atxiki gabekoaren aurkako botoekin eta EH Bildu eta Contigo-Zurekin talde parlamentarioen aldeko botoekin. Mozio horren bidez, Landa Garapeneko eta Ingurumeneko Departamentua premiatzen zen "12 hilabeteko epean desazkunde-politikei buruzko foru-estrategia gara dezan".

Zioen azalpenean, Contigo-Zurekin talde parlamentarioak bultzatutako mozioak Klima Aldaketaren Nafarroako Herritarren Batzarrak oraintsu argitaratu duen Gomendio Txostena aipatzen zuen eta adierazten zuen erakunde publiko guztiek beren jardueraren eta eskumenen esparruan ondasunen eta energiaren ekoizpena eta kontsumoa murriztea proposatzen duten estrategia planifikatuak baliatu behar dituztela, ekonomia planetaren mugekin orekatzen laguntzeko.

Horri dagokionez, talde proposatzailea administraziora bideratutako proposamenetan jartzen du arreta, zehazki 49. zenbakikoan, zeinak energiaren eta ondasun materialen erabilera murriztea gomendatzen baitu, eta aldarrikatzen baitu beharrezkoa dela "desazkundearen, mugikortasun jasangarriaren, energia berriztagarrien eta material-berrerabilpenaren eta -berreskurapenaren alde” apustu egitea, eta, tresna gisa, ingurumen-fiskalitatea eta ingurumen-araudia egiaz betetzea. Horretarako, "funtsezkotzat" jotzen da Beherapen Politiken Foru Estrategia garatzea.

• https://parlamentodenavarra.es/eu
• Mozioa (22. NPAO, 2026-03-06koa)