Parlamentuaren osoko bilkurak ebazpen bat onetsi du gaur UPNren, Geroa Bairen, PPNren, Talde Mistoaren eta atxiki gabeko parlamentariaren aldeko botoekin eta PSNren, EH Bilduren eta Contigo-Zurekinen aurkakoekin, zeinaren Nafarroako Gobernua premiatzen baita “5 milioi eurotik gorako lehiaketa publikoen kasuan espedientea nahitaez bidal dakion Nafarroako Kontratazio Publikoko Batzordeari, berrikus dezan, baldin eta kontratazio-mahaian boto partikularren bat egon bada”.

Onetsitako ebazpenak bigarren atalean foru exekutiboari eskatzen dio “zorrotz bete dezan Gardentasunari buruzko Foru Legea, Gobernuko kideen, haren goi-kargudunen eta derrigortuta dauden gainerako langileen agendei dagokienez, eta Gardentasunaren Atarian argitara eman dadin, enpresekin, pertsonekin eta entitateekin egindako bilerei dagokienez, bilera horiek non eta noiz egin diren, nork parte hartu duen eta zer gai jorratu diren”.

Jatorrizko testuak beste atal bat zuen, baztertu egin dena PSNren, EH Bilduren, Geroa Bairen eta Contigo-Zurekinen aurkako botoekin eta UPNren, PPNren, Talde Mistoaren eta atxiki gabeko parlamentariaren aldekoekin. Bertan eskatzen zen “legebiltzar honetan Nafarroako Gobernuaren kudeaketa aztertzen duen ikerketa-batzorde bat irekitzen bada Gobernuko lehendakaria bertan agerraldia egitera behartuta egon dadin, eman beharreko azalpenak emateko”.

Era berean, besta atal bat baztertu da PSNren, EH Bilduren eta Contigo-Zurekinen aurkako botoekin, Geroa Bairen abstentzioarekin eta UPNren, PPNren, Talde Mistoaren eta atxiki gabeko parlamentariaren aldekoekin, zeinaren bidez Nafarroako Gobernu premiatzen zen “neurriak har ditzan kontratazio-mahaietan boto partikularrak ematen dituzten funtzionarioak esparru politikotik egindako errepresalietatik eta seinalamenduetatik babesteko”.

Zioen azalpenean, UPNk sustatu duen ebazpenak Foru Gobernuari egozten dio informazioa ezkutatu eta funtzionarioen agerraldia mugatu izana bereziki “susmagarria” den Belateko tunelen bikoizketaren esleipenaen inguruan. “Bereziki susmagarria da 76 milioi euroko obra bat esleitu zaiolako Santos Cerdánen jabetzako ABEE bati, Servinabarri, eta UCOren txostenek Santos Cerdánek zuzendutako ustezko trama bat aipatzen dute, Espainia osoan, baita Nafarroan ere, obra publikoen adjudikaziodun izan ziren enpresa eta pertsona jakin batzuei lotua”.

Ildo horretan eta diru publikoaren kudeaketan “eredugarritasuna, zorroztasuna eta gardentasuna” aldarrikatu ostean, ebazpena sustatu duen taldeak “boto partikularrak eta kontratazio-mahaiko kideek irregulartasunei buruz egindako ohartarazpenak” gogorarazi ditu, kontrol-mekanismoak indar daitezen eskatzeko.

• www.nafarroakoparlamentua.eus
• Mozioa (104. NPAO, 2025-09-16koa)