Nafarroako Gobernua premiatzen da autokontsumorako hurbileko energia berriztagarrien sorrera susta dezan
Osoko Bilkuran onetsia. 2021eko maiatzaren 13an
1.- Nafarroako Gobernua premiatzen da susta dezan herritarrek parte-hartzea energia berriztagarrien bitartezko sistemen garapenean eta kudeaketan, Energia Berriztagarrirako Herritar Erkidegoei bultzada emanez, halakotzat ulerturik proiektutik hurbileko energia berriztagarrien eskala txikiko ekoizpenean dihardutenak, xede nagusi dutela erkidegoaren kideentzako energia-zerbitzuak eskaintzea, hala nola iturri berriztagarrietatiko energiaren sorkuntza eta energiaren hornidura eta biltegiratzea.
2.- Exekutiboari eskatzen zaio hurbileko energia-sorkuntzaren garapenari bultzada eman diezaion, udalerriekin lankidetzan, halako moldez non toki-mailako energia-erkidegoak eratuko baitira, halakotzat ulerturik autonomoak diren entitateak, energia berriztagarrirako proiektuetatik hurbil kokatuta daudenak eta helburutzat dutenak onurak ekartzea haien bazkideei, kideei edo diharduteneko toki-eskualdeei, ingurumenaren, ekonomiaren edo gizartearen esparruetan.
3.- Nafar Gobernua behartzen da susta dezan administrazio publikoek, ahal den neurrian eta legez ezarritako prozedurei jarraikiz, eskueran ipintzea beren titulartasunekoak diren lursailak edo espazioak, zuzenbidearen arabera eraturik dauden energia berriztagarrirako herritar erkidegoen edo toki-mailako energia-erkidegoen mesedetan, xede harturik energia berriztagarrien sorkuntzarako proiektuak edo energia-biltegiratzekoak garatzea.
4.- Foru Exekutiboari eskatzen zaio Nafarroako Kooperatibei buruzko Legearen aldaketa susta dezan, energia berriztagarrirako herritar erkidegoetako eta toki-mailako energia-erkidegoetako kideen eskubideak zehaztearren.
5.- Nafarroako Gobernua premiatzen da beharrezkoak diren zuzemenak egin ditzan, energia elektrikoa garraiatu eta banatzeko sareetarako sarbide eta konexioaren erregelamendu-esparrua kupo arautuen bidez egin dadin, potentzia-tarteak eskainiko dituztenak, halako moldez non edonolako instalazioek bermatuta izanen baitute konexioa egitea instalazio txiki edo ertainetako soberakinak kanporatu ahal izateko moduan.
6.- Nafarroako Gobernua premiatzen da pizgarri eta babes ekonomikoa eman dezan energia-kudeatzaileak kontratatzeko eta Nafarroako toki entitateek auditoretza energetikoak prestatzeko.
7.- Nafarroako Gobernuari eskatzen zaio susta dezan entitate publiko nahiz pribatuek kudeaketa energetiko efizienterako sistemak prestatzea, energiaren erabilera jasangarria lortze aldera, kontsumoaren eta karbono-aztarnaren eta horien amai-kostuen murrizketaren bidez.
8.- Nafarroako Gobernua premiatzen da herritarrak efizientzia energetikoaren arloan sentsibilizatzeko eta kontzientziatzeko kanpainak egin ditzan, bai eta hezkuntza-programak ere, orokorrak eta asmo handikoak, horretan eragina izanen dutenak.
9.- Estatuko Gobernua premiatzen da klima-aldaketaren aurkako borrokan aurrerapausoak emateko sinaturiko konpromisoak bete daitezen, besteak beste honakoei dagokienez: elektrizitate-merkatuaren berrantolamendua, elektrizitate-fakturaren berrantolamendua, bidezko trantsiziorako estrategia, gizarte-bonuaren berrantolamendua, mugikortasun jasangarriko plana, fiskalitate berdea, Green New Deal delakoaren bultzada.
PSN talde parlamentarioak aurkeztu du.
1, 2, 3, 4 eta 5. atalak PSNren, Geroa Bairen, EH Bilduren, Podemos-Ahal Duguren eta I-Eren aldeko botoekin eta Navarra Sumaren abstentzioarekin onetsi dira.
6. puntua Geroa Bairen aldeko botoarekin onetsi da, Navarra Suma, PSN, EH Bildu, Podemos-Ahal Dugu eta I-E abstenitu egin dira.
7. puntuan Geroa Baik eta PSNk alde bozkatu dute, Navarra Suma abstenitu egin da eta EH Bilduk, Podemos-Ahal Duguk eta I-Ek aurkako botoa eman dute.
8. eta 9. atalak PSNren, Geroa Bairen, EH Bilduren, Podemos-Ahal Duguren eta I-Eren aldeko botoekin eta Navarra Sumaren abstentzioarekin onetsi dira.