Gaurkoan, Parlamentuaren Osoko Bilkurak, PSN, EH Bildu, Geroa Bai eta Contigo-Zurekinek emandako aldeko botoekin, UPN eta PPNren abstentzioekin eta Talde Mistoaren eta atxikigabearen aurkako botoekin, erabaki bat onetsi du, zeinaren bidez Nafarroako Parlamentuak adierazten baitu ezen “Nafarroa osoan ontzien gordailu, itzulketa eta itzulerako sistema ezartzeak aukera emanen die[la] Nafarroako toki-entitateei honako hauek agindutako bilketa bereiziaren helburuak lortzeko: Nafarroako Hondakinen Plana, Hondakinak eta Lurzoru Kutsatuak arautu eta Ekonomia Zirkularra bultzatzeko apirilaren 8ko 7/2022 Legea eta aplikatzekoa zaien Europako araudia; bereziki, Europako Parlamentuaren eta Kontseiluaren 2024ko abenduaren 19ko 2025/40 (EB) Erregelamendua, ontziei eta ontzi-hondakinei buruzkoa, zeinaren bidez aldatzen baitira 2019/1020 (EB) Erregelamendua eta 2019/904 (EB) Zuzentaraua, eta 94/62/EE Zuzentaraua indargabetzen baita”.

Onetsitako erabakiak bigarren puntu batean honako hau dio: “Nafarroako Parlamentuak uste du Nafarroa osoan ontzien gordailu, itzulketa eta itzulerako sistema ezartzea onuragarria izanen dela ekoizlearen erantzukizun zabalduaren sistema kolektiboentzat, aukera emanen baitie ekoizlearen erantzukizun zabaldua betetzeko eta inbertsio seguruak eta kontrolatuak eskala txikiagoan egiteko, arriskua mugatuz eta ondoren Estatuko gainerako lekuetan errepikatzeko aukera emanez”.

Halaber, hirugarren puntu bat ere badauka, eta “Nafarroako Gobernua premiatzen du beharrezkoak diren erabakiak har ditzan eta ekimenak abiaraz ditzan, bere eskumenei dagokienez, Nafarroa osoan ontzien gordailu, itzulketa eta itzulerako sistema ezartzeko, eta, behar izanez gero, Nafarroako Hondakinen Plana alda dezan ontzien hondakinak biltzeko sistema hori ezartzeko”.

Azkenik, Parlamentuak erabaki du “mozio honen ebazpenak helaraztea hondakinen bilketan eskumena duten Nafarroako toki-entitateei eta Nafarroako Hondakinen Partzuergoari, erakunde honek Nafarroa osoan ontzien gordailu, itzulketa eta itzulerako sistema ezartzearen alde duen borondatea kontuan har dezaten”.

UPNk bi zuzenketa aurkeztu ditu, baina ekimenaren egile diren PSN, EH Bildu, Geroa Bai eta Contigo-Zurekinek ez dituzte onartu. Zuzenketa horiek eskatzen zuten xehetasunezko txosten tekniko eta ekonomiko bat egin zedila, gordailu, itzulketa eta itzulerako sistema modu orokorrean ezartzeari buruzko edozein erabaki hartu aurretik, bai eta lan-mahai tekniko bat eratzea ere, zeinak, Nafarroako Udalerri eta Kontzejuen Federazioaren, Hondakin Mankomunitateen eta Nafarroako merkataritza- eta ostalaritza-elkarteen parte-hartzearekin, “bermatuko baitu ezen ontzi-bilketako sistemaren bilakaera orok adostasuna izatea ukituriko sektorearengandik, bai eta kofinantzaketa-plan bat ere, ez udalak ez kontsumitaileak ere ez dituena zamatuko. Iruña”.

Zioen azalpenean, PSN, EH Bildu, Geroa Bai eta Contigo-Zurekinek bultzaturiko erabakiak azaltzen du Parlamentuak aldeztu egiten duela ontzien gordailu, itzulketa eta itzulerako sistema baten ezarpena, halako moldez non, 2025eko ekainetik abuztura bitartean Zangozan eginiko proba pilotuaren arrakastaren ondoren, zeinean 237.789 lata eta plastikozko botila (% 82) jaso baitziren hiru hilabetean, orokortu eginen baita epe luzeko zirkulartasun baten aldeko apustua, horrela modua emanik kalitate handiko birziklapena sortzeko eta soziala, berdea eta duina den enplegu-mota bat sustatzeko.

Nafarroak erakutsitako “kaudimen tekniko, ekonomiko eta antolaketakoa” dela-eta, eta kontuan harturik gordailu, itzulketa eta itzulerako sistemaren ezarpenak eskainiko lituzkeen “emaitza potentzialak”, baita ingurumenaren eta osasunaren ikuspegitik ere (ehun milaka ontzi lurperatzen eta/edo abandonatzen dira gaur egun), eskatzen da hondakin-bilketaren gaineko eskumena duten toki-entitateen inplikazioa, Nafarroako Hondakin Planak eta Nafarroako nahiz Europako araudi osoak ezarritako helburuak betetzeko.

• https://parlamentodenavarra.es/eu
• Mozioa (18. NPAO, 2026-02-20koa)