Ana Ollo Nafarroako Gobernuko Herritarrekiko Harremanetarako kontseilariak ziurtatu duenez, azken urteetan Nafarroak irabazi dituen euskal hiztunak, "hein handi batean", helduak dira, eta 2016tik 2020ra % 14,5 igo da ikastaroetan izena eman duten pertsonen kopurua, 2020an 5.229ra iritsiz.

Hala adierazi du ostegun honetan Osoko Bilkuran, EH Bilduk helduen euskalduntze eta alfabetatze politika orokorrari buruz egindako interpelazioari erantzunez.

Ollok gaineratu duenez, 2016tik "gora egin du euskara ikasten duten ikasleen kopuruak helduen euskalduntze-zentroetan", baina "azken ikasturtean, pandemiak bere eragina izan du helduen irakaskuntza guztietan, baita euskarari dagokionean ere, baina orain 21-22 ikasturteko behin betiko daturik ez dugun arren, badirudi Covid aurreko urteetako joera berreskuratu dela", adierazi du kontseilariak.

Ollok esandakoaren arabera, pertsona gehienak ekimen sozialeko euskaltegietan inskribatzen dira, % 40 inguru, baina Zubiarte eta Euskarabidea ikastetxe publikoetan ere % 40 inguru daude. Azken ikastetxe horretan eskariaren igoera "esanguratsua" da, lau urtetan 753 ikasle izatetik 1.026 ikasle izatera igaro baita.

Helduen euskalduntzera bideratutako baliabide publikoei dagokienez, ziurtatu du aurreko legegintzaldiaren hasieratik euskaltegien finantzazioa hobetu dela, 2022ko aurrekontuetan 1,8 milioira iritsiz, eta ikasleentzako bekak sortu direla. Aurretik xede horretara bideratutako baliabideak (131.867 euro) "herritarren eskubideak asetzeko ez ziren nahikoak".

"2015ean ez zegoen finantzaketa egokirik eta sektorearen prekarietatea larria zen. Ahalegin handia egin da, baina asko dago egiteko euskara ikasteko eskubidea erabat bermatzeko eta doakotasunera hurbiltzeko ", adierazi du Ollo kontseilariak, euskara ikasi nahi duten helduen kopurua "handitu" den arren, “oraindik hobetzeko tarte handia" dagoela azpimarratu ondoren.

Gainera, "Nafarroako berezko hizkuntza honen prestigio ekintzak sustatzeko" lanean ari direla adierazi du, adibidez, helduei euskara irakasteko ikasturte hasierako ekitaldi bat antolatuz. "Horrela, helduen euskalduntzearen izaera ekonomikoa eta hezitzailea aitortu eta balioa eman nahi zaio", adierazi du.

Halaber, Ana Ollok azpimarratu duenez, "azken hamarkadetan herritar asko etorri dira atzerritik Nafarroara", eta euskara ikastea "gizarteratzeko aukera" da.

"Gaztelania eta euskara hizkuntza propioak dira, eta herritar guztiek dute hizkuntza horiek ezagutzeko eta erabiltzeko eskubidea", azpimarratu du, eta legegintzaldi honetan "aurreko legegintzaldian hasitako bideari jarraitu zaio, helduen euskalduntze eta alfabetatzearen eremua indartuz eta, Euskararen Legean jasotzen den bezala, oinarriak jarriz herritarren eskubide eraginkorra izan dadin".

"Euskarak baliabide egokiak behar ditu, eta hitz egiten duten pertsonek, berriz, erabiltzeko espazioak", esan du kontseilariak, esparru horretan "liskarrak baztertzeko" apustua egin ondoren.

Bakartxo Ruizek (EH Bildu) azpimarratu duenez, garrantzitsua da "nahi duten helduek euskara ikasteko duten eskubidea bermatuta ikustea, eta hori ahalik eta baldintza egokienetan egitea". "Justizia kontua" dela ziurtatu ostean, eskubide hori gauzatu ahal izateko ordaindu behar izatea "onargarria ez" dela ziurtatu du. "Eskubideez ari gara, ez kapritxoez", berretsi du.

Iñaki Iriartek (Navarra Suma) adierazi du eskaintza "ahalik eta eraginkorrena" izan behar dela, baina zalantzan jarri du doan eskaini behar ote den, ingelesa ez bezala. "Helduei euskara ikasten lagundu behar zaie, baina kontuz ibili euskararekiko interesik ez duten eta beste hizkuntza batzuk ikasi nahi edo behar dituzten nafarrei jaramonik ez egitearekin", ohartarazi du.

Inma Juríok (PSN) PSNren "apustu garbia" azpimarratu du, pertsona heldu orok euskara ezagutzeko eskubidea izan dezan, nahiz eta ez duen bat egin sistemaren doakotasunarekin.

Jabi Arakamak (Geroa Bai) helburu horretara bideratutako aurrekontua handitu dela azpimarratu du, UPNk emandako "zero euroen" aurrean, baina doakotasunetik "urrun" gaudela adierazi du.

Ainhoa Aznárezek (Podemos-Ahal Dugu) adierazi du eskubide bat arau batean jasotzeak ez dakarrela "betebehar edo inposaketarik", eta Marisa de Simónek (I-E) "Nafarroako pertsonek guztion ondarea den hizkuntza eta kultura bat ezagutzeko duten eskubidea errespetatzearen" alde egin du, "euskara hizkuntza propioa baita".