Nafarroako Gobernuko Unibertsitateko, Berrikuntzako eta Eraldaketa Digitaleko kontseilari Juan Cruz Cigudosak aitortu du Nafarroan adimen artifizialeko ikerketak "kalitate eskasa" duela, eta Foru Erkidegoan "nitxo espezifiko" bat sortzearen alde egin du, zentro baten bidez AAn egiten diren ikerketek "enpresetan oihartzuna izan dezaten”.

Geroa Baik Kontrolerako Osoko Bilkuran egindako interpelazio baten esparruan, Cigudosak adierazi du AA "bosgarren iraultza industriala" dela, baina zehaztu du "zientzia eta teknologia, berez, ez direla nahikoa hazkunde iraunkor eta jarraitu bat ziurtatzeko", baizik eta "Administrazio publikoek apustu irmoa egin behar dutela baliabideak bermatzeko" eta "lankidetza publiko-pribatuko" ingurune bat sortzeko. Adierazi duenez, sektore publikoak "modu arduratsuan lagundu behar du garapen hori, lurralde bakoitzeko inbertsioei lehentasuna emango dieten esparru arautzaile eta lehiakor egokiekin".

Kontseilariak uste du Nafarroak "nitxo espezifiko bat" izan dezakeela, "maila autonomikoan kalitatezko hub bat sortzeko". Azaldu duenez, adimen artifizialari buruz ikertzeko irtenbideak kanpoko multinazionaletatik datoz, eta, beraz, Nafarroaren papera "prozesuak hobetzean" geratzen da. “Tokiko berrikuntzan lortzen dugun esperientziak beste enpresa batzuk hobetzeko balioko du", azpimarratu du.

Era berean, Cigudosak aitortu du "Nafarroan kalitate eskasa dugula", eta Nafarroako enpresa teknologikoek "gaitasuna eta ahalmena" izatearen garrantzia azpimarratu du. Hala, adierazi duenez, AAn zentratutako enpresa ertain eta handiak daude, baina "ez dago horrelako enpresa-eskaera handirik", eta "enpresa txiki eta ertain gehienek digitalizazioa mugatuta dute".

Kontseilariak azaldu duenez, enpresen arazo nagusiak honako hauek dira: datu estandarizaturik ez izatea, konponbideak ezartzea eta "lehiakide gisa ikusten dituzten" beste zentro batzuekin lan egitea. Horren aurrean, SINAI "irtenbideak eskaintzen ari da", NUPek AAn egindako "apustu sendoarekin" batera, eta horrek "profil akademiko ugari dakartza".

Hala, adierazi duenez, "Nafarroako enpresen gaitasuna indartzeko", Adimen Artifizialeko ikerketa-zentro bat abian jartzeko lanean ari dira, SINAIn integratuta egongo dena, "ikusmira nazioartean jarrita, NUPekin bat eginda, ikerketa aplikatuan zentratuta, epe luzerako planteamenduarekin eta talde indartsu bat atzean edukiz”. Zentro horretarako dagoeneko izendatu dira zuzendari kudeatzailea eta zuzendari zientifikoa.

Bestalde, Maria Solanak (Geroa Bai) Nafarroan AAren aldeko "apustu irmoa" eskatu du, "erkidego honen garapenaren etorkizuneko zutabe bihur daitekeena". Apustu horrek "erradikala izan behar du zentzu guztietan, filosofiari, praktikari eta aurrekontuari dagokienez", eta "maila globalean lehiatzeko gai izan behar dugu", adierazi du. Horregatik, "hartutako konpromisoak" aurrekontuetan islatzeko eskaera egin du, "denbora agortzen ari baita". Ildo horretan, Administrazioak "garapen hori kontrolatzeko" duen "erantzukizuna" azpimarratu du.

Angel Ansak (Navarra Suma) adierazi duenez, "Gobernua ke asko saltzen ari da", eta orain arte "eraiki gabe dagoen" zentro baten gerentea kontratatu besterik ez dela egin adierazi du. Nafarroak "ahultasunak" dituela ziurtatu du, "ez baitu IKT talenturik erakartzen orokorrean eta AAn bereziki, fiskalitate negargarria du, ez da erakargarria enpresa teknologikoentzat, eta gainera gaizki komunikatuta dago. Gure Erkidegoak dituen ahuleziak zuzendu behar ditugu, eta zentro horren abiaraztea bizkortu behar da".

Javier Lecumberrik (PSN) gaitzetsi egin ditu "oposizioaren kritika burugabeak, guztiok elkarrekin eta babesa emanez egon beharko genukeen gai honetan". "AAren trena ez galtzeko" deia egin du, eta automobilgintzan, nekazaritzako elikaduran edo medikuntzan espezializatzea "funtsezkoa" dela esan du. Eta "muga moralak" ezartzearen eta "abian jartzen ari den" ikerketa-zentroa bultzatzearen alde egin du, unibertsitateekin batera.

Arantxa Izurdiagak (EH Bildu) azpimarratu duenez, AAk datozen urteetan "eragin oso garrantzitsua izango du garapen ekonomiko eta sozialean, eta tresna garrantzitsua izan daiteke administrazio publikoari ingurumen-trantsizioari, erronka demografikoari eta enpleguari aurre egiten laguntzeko". Hala ere, "oso berde gaude Nafarroako Gobernuak hartu behar duen rolaren definizioan", adierazi du, eta etorkizuneko ikerketa-zentroaren helburuak, ildo estrategikoak eta negozio-plana "oso argi izan gabe" jarraitzen dugula gaineratu du.

Ainhoa Aznarezek (Podemos-Ahal Dugu) teknologia honen "aukerak” aipatzeaz gain, arreta eman du “arrisku eta beldurren aurrean". Hala, "AAren teknologiak segurtasun-esparruen barruan trazagarriak eta egiaztagarriak egitea proposatu du, bai eta Datuak Babesteko Estatu Agentziari ikuskapen independentea egitea ahalbidetuko duten formulak asmatzea ere".

Azkenik, Marisa de Simónek (Izquierda-Ezkerra) galdegin du “ea nola eragingo duen AAren garapenak gure bizitzetan eta gizarte justuago eta garatuago baten garapenean”, eta “ea produktibitatearen hazkundea lanaren kalitateari lotuta joango den". Horregatik, "efektuak aurreikusteko eta iragazki etiko batetik igarotzeko" eskatu du.