Itziar Gomez Nafarroako Gobernuko Landa Garapeneko eta Ingurumeneko kontseilariak adierazi du Foru Gobernuak bide-orri "argia" duela, "ondo diseinatutako plangintzarekin". Legegintzaldiaren hasieran sortu zen, eta Gobernuaren politikak hedatzeko "aterkia" da.

Hala adierazi du Podemos-Ahal Duguk Kontrolerako Osoko Bilkuran larrialdi klimatikoaren arloko politika orokorrari buruz egindako interpelazioan.

"Beharrezkoa da ingurumen-politiken eta -ekintzen zeharkako ikuspegia, eta Nafarroako Gobernuan horrela ulertzen dugu", ziurtatu du kontseilariak, eta Gobernuak garatutako neurriak aipatu ditu, hala nola Navarra Green trantsizio ekologikorako estrategia, mugikortasun jasangarriaren edo energia berriztagarrien inguruko proiektuak jasotzen dituena, besteak beste.

Gomezen arabera, "sei ardatz handiko aterkia" da, eta hainbat proiektu "garrantzitsutan" gauzatzen da, hala nola Nafarroako Ubidea eguzki-plakekin estaltzea; Sakanako korridore ekologikoa, React funtsetatik 5 milioi eurorekin finantzatua; Faltzesko motaren eraikuntza, hirigunean uholdeak saihesteko, Europako funtsekin ere finantzatua; edo ibai-ekosistemen leheneratzea eta hondakinen kudeaketa, besteak beste.

Beste departamentu batzuetan garatutako beste proiektu batzuk ere aipatu ditu, hala nola Biziberri Nafarroako etxebizitzak eta eraikinak birgaitzeko proiektua. Kontseilariak gaineratu duenez, azken 6 urteotan higiezinak birgaitzeko proiektuak "hirukoiztu baino gehiago egin dira, 2015ean 53 espediente eta 314 etxebizitza izatetik joan den ekitaldian 230 espediente izatera igaro baitira, 976 etxebizitza birgaiturekin". Ildo horretan, emandako dirulaguntzak "proportzio berean handitu dira", 1,3 milioitik 4,3ra, eta inbertsio osoa "12 milioi baino gehiagokoa" izan da.

Era berean, kontseilariak ibilgailu elektrikoen erosketa eta karga-puntuen instalazioa bultzatzeko Moves Plana gauzatzeari egin dio erreferentzia. "Nafarroak laguntza horiek hobekien kudeatzen dituen erkidegoa izaten jarraitzen du", ziurtatu du, eta gaineratu du Nafarroak 5 milioi euro zituela esleituta, baina "laguntzen gauzatze handiaren ondorioz" 18 milioi euro gehiago eskatu zirela eta, onartu ondoren, laguntza horien aurrekontua 23,5 milioi eurokoa izan dela Erkidegorako.

Bestalde, Gomezek azpimarratu du Nafarroako Jauregia modernizatzeko lanek kontsumo elektrikoaren % 90 aurreztea ekarriko dutela. "Beste urrats bat da, jarduketa orok ekonomia berderako trantsiziorantz, eraginkortasun energetikoaren hobekuntzarantz eta CO2 emisioen murrizketarantz jotzen baitu Nafarroako Gobernuaren egoitzan".

Kontseilariak LIFE NAdapta proiektua ere aipatu du, uraren, basoen, osasunaren, azpiegituren eta nekazaritzaren eta abeltzaintzaren arloko jarduketak jasotzen dituena, "sektore anitzeko ikuspegi estrategiko batekin". Gaineratu duenez, proiektua "departamentuen eta beste erakunde batzuen arteko koordinazio-bektorea" da, lau sozietate publiko baitaude tartean.

Ainhoa Aznarezek (Podemos-Ahal Dugu) esan du "eztabaidaezina" dela larrialdi klimatikoko egoera batean gaudela, eta hainbat neurri proposatu ditu, "gutxieneko gastuarekin", hala nola Foru Parlamentuaren beraren kontsumoari buruzko azterlanak eguneratzea, instalazioen "eraginkortasun energetikoa maximizatu ahal izateko" edo auditoria berri bat enkargatzeko. Era berean, eraikinean eguzki-plakak instalatzea gomendatu du, autokontsumorako, berdeguneak bultzatzeko eta galdara komunitarioak dituzten familiei konpentsazioak arintzeko, besteak beste.

Elena Llorentek (Navarra Suma) esan du bere koalizioa energia berriztagarrien aldekoa dela, nahiz eta "bere mugez jabetzen" diren, hala nola "ekoizpena planifikatzeko orduan dagoen ziurgabetasunaz". "Kontsumoa murriztearen" eta energia berriztagarri "hibridatuen" ezarpen masiboaren "aldeko apustua egin ondoren, Llorentek azpimarratu du "administrazio bizkorrak" behar direla, “Nafarroan Gomez kontseilariarekin gertatzen ari den bezala", berriztagarrien garapena "oztopatuko" ez dutenak.

Javier Lecumberri (PSN) bat etorri da berriztagarrien bidez energia sortzeko egiturazko aldaketa baten beharrarekin. Eskuineko gobernuek "energia horiek zigortzen eta trabatzen zituzten. Pozten gara gai horiei buruzko ikuspegia aldatu delako, baina egiturazko aldaketa horretaz gain, gai zuzenagoetan ere kokatu beharko gara".

Pablo Azconak (Geroa Bai) nabarmendu duenez, "eredu energetiko berri baterantz jo behar da, karbono emisio gutxiko ekonomia zirkular baterantz, eta energia fosilak berriztagarriekin ordezkatu behar dira", eta Nafarroan "azken hilabeteetan gauzatzen joan diren eta praktikan jarri behar ditugun egitate eta konpromiso egiazkoak" daudela uste du. Azconak azpimarratu du klima aldaketaren legea "mugarria" izan dela eta "Nafarroa bide onean" doala "erronka handi honen aurrean".

Laura Aznalek (EH Bildu) kritikatu du egungo egoera aurretiazko jardueren ondorioa dela, eta orain planetari jarraipena eman nahi badiogu, duela hamarkada askotatik ohartarazten ari zaigunari, “jada balio ez duen garapen eredu bat irauli” behar dela. "Sistema kapitalistak bere baitan darama planetaren suntsiketaren ernamuina, eta bistan da", aldarrikatu du, EH Bildu klima aldaketaren legearen erregelamendu bidezko garapenean "anbizio handikoa" izango dela ziurtatu ondoren.

Azkenik, Marisa de Simonek (I-E) uste du Nafarroak "lege eta bide-orri egokia" dituela, baina gai hori "ez dago beti gure esku". Nafarroatik gure harri-koskorrarekin lagundu dezakegu eta lagundu behar dugu", adierazi du, "gure bide-orria oso indartsua da", baina krisi klimatiko eta energetiko batean gaude, eta "irtenbideak zientziatik" eta baliabideen birbanaketatik etorri behar dira.