Nafarroako Parlamentuko Memoria eta Bizikidetzako, Kanpo Ekintzako eta Euskarako Batzordeak ebazpen bat onetsi du gaur UPN, PSN, EH Bildu, Geroa Bai eta Contigo-Zurekin taldeen aldeko botoekin eta PPNren aurkakoarekin, zeinaren bidez Nafarroako Memoriaren Institutua premiatzen baita “zuzendu eta eguneratu ditzan, Berriozarko, Berriobeitiko eta Antsoaingo udalen eta Txinparta Fuerte San Cristóbal Memoria Kolektiboaren Sarearen eskutik, bi toki horiei buruzko informazioak, herri horietako hilerrietako, Ezkabako Gotorlekuko, Ihes Egindakoen Monolitoko eta Botilen Hilerriko paneletan daudenak”.

Onetsitako ebazpenak bigarren atal bat dauka, UPNk aurkeztu duen eta Contigo-Zurekinek onartu duen gehitzeko in voce zuzenketa baten bidez gehitu dena, eta bertan zehazten da “aurreko guztia San Cristobal Gotorlekuko Protokolo Orokorrean jasotako konpromiso eta betebeharren barruan" kokatuko dela. PSNk atal honen aurkako botoa eman du eta gainerako taldeek botoa mantendu dute.

Contigo-Zurekin talde parlamentarioak aurkeztu duen ebazpenak, zioen azalpenean, joan den ekainaren 24an Nafarroako Parlamentuko Memoria eta Bizikidetzako, Kanpo Ekintzako eta Euskarako Batzordeak Ezkabako Gotorlekura eta Botilen Hilerrira egindako bisita oroitu du, izan ere, Txinparta Fuerte San Cristóbal Memoria Kolektiboaren Sareko ordezkariek parlamentariei jakinarazi zieten akatsak daudela Botilen Hilerrian dagoen informazio-panelean jasotako informazioan. Informazio-panel hori Berriozar, Berriobeiti eta Antsoaingo udalek paratu zuten bere garaian.

Ebazpena aurkeztu duen taldeak azaldu duenez, Ezkabako Gotorlekua eta haren ingurunea Memoriaren Leku izendatuko dira laster eta, izendapen hori gutxi barru eginen denez, beharrezkoa da inplikatutako administrazio publikoek, mugimendu memorialistaren eskutik (kasu honetan, Txinparta Fuerte San Cristóbal Memoria Kolektiboaren Sarea), arduraz zuzentzea eta eguneratzea Botilen Hilerrian dagoen panelean eta gune memorialista horren inguruko gainerako panel eta plaketan azaldutako informazioa.

Bilkuraren buru Itxaso Soto (Geroa Bai talde parlamentarioa) izan da, eta bertan parte hartu dute, orobat, honako hauek: Isabel Olave, Ana Elizalde, Juan Luis Sánchez de Muniáin, Marta Álvarez (UPN talde parlamentarioa), Kevin Lucero, Ibai Crespo, Maite Esporrín (PSN talde parlamentarioa), Eneka Maiz (EH Bildu talde parlamentarioa), Mikel Asiain (Geroa Bai talde parlamentarioa), Maribel García Malo (PPN talde parlamentarioa) eta Carlos Guzmán (Contigo-Zurekin talde parlamentarioa).

• www.parlamentodenavarra.es/eu
• Mozioaren argitalpena (NPAO, 98. zk., 2025-09-05)