Nafarroako Parlamentuak Diabetesaren Mundu Egunarekin bat egiteko ekitaldi instituzionala egin du gaur ANADI Diabetesaren Nafarroako Elkartearekin batera. Mundu eguna astelehen honetan (hilak 14) ospatu zen Etorkizuna babesteko heztea lelopean, formakuntzarako eskubidea zaintzeko eta indartzeko premian eragiteko premisarekin, patologia horrekin bizi diren pertsonen bizi-kalitatea hobetzeko biderik onena dela sinetsita.

Hala berretsi du Unai Hualde Parlamentuko lehendakariak, eta ANADIk Foru Erkidegoan egiten duen lanaren aitortza egin du. “Eragile soziosanitarioekin lankidetzan aritzen da diabetesa duten pertsonen bizi-kalitatea hobetzeko eta babes handiagoa emateko”, eta, aldi berean, “erakunde publikoekin lankidetzan aritzen da arreta soziosanitarioa hobetzeko eta prestakuntza eta heziketa diabetologikoa exijitzeko”.

“Egoera sozial eta sanitario zaila bizi dugu. Pandemiak gure iragan hurbila markatu du, baina, aldi berean, osasun-sistema publiko ona izatearen garrantzia berretsi digu. Horretan ari gara, Legebiltzar hau lanean ari da funtsezko zerbitzu publikoak indartzen jarraitzeko”.

Lehendakariak gogorarazi duenez, gaur egun, “konplikazioak saihesteko laguntza eta etengabeko arreta behar duten diabetesa duten milioika pertsonak ez dute bidezko aukerarik beren patología artatua izan dadin. Hortik dator aurtengo aldarrikapena, kaltetuentzako eta haien familientzako osasun-eskubideetan benetako aurrerapausoak gauza daitezen”.

Amaitzeko, Hualdek ikerketa zientifikoaren garrantzia azpimarratu du, eta horretan inbertitzen jarraitzeko beharra azpimarratu du. Horrez gain, Mahaiak eta Eledunen Batzarrak astelehenean, azaroaren 14an, onartutako adierazpen instituzionala ekarri du gogora. “Berriro diot, prebentzioa sustatu behar da, pazienteen eta profesionalen prestakuntza bultzatu eta diabetesaren ikusgarritasuna aldarrikatu. Berriz ere eskerrak eman nahi dizkiogu Anadiri. Eskerrik asko zuen lanagatik”.

Jarraian, Juantxo Remón ANADI elkarteko presidenteak diabetesaren Nafarroako egoeraren errepasoa egin du. “38.000 pertsona daude diagnostikatuta eta, kalkulatzen denez, 20.000 inguru diagnostikatu gabe daude. Horrek detekzio goiztiarraren garrantzia areagotu baino ez du egiten. Horretarako, profesionalen eta gaixoen formakuntza handiagoa beharko litzateke, konplikazioak saihestuko lituzkeelako eta osasun-gastua murriztuko lukeelako”.

Testuinguru horretan, Remonek gogorarazi du “17 urte daramatzagula helduen diziplina anitzeko unitate endokrinoa eskatzen. Halaber, 2 motako paziente intsulinizatuari glukosa etengabe monitorizatzeko gailua ematea eskatzen dugu, ziztada ugariak saihesteko”.

Anadiko presidenteak, amaitzeko, ikastetxeetan erizain profesionalaren figura sartzeko eskatu du, diabetesa duten ikasleei arreta emateko egungo protokoloak ez dituelako adingabearen behar guztiak betetzen. Azken batean, “autonomo izateko eta ongizate fisikoa, mentala eta soziala lortzeko ezinbestekoak diren hezkuntza eta arreta izatea da kontua”.

Jarraian, María Pascualek, ANADIko kide eta 1. motako diabetesa diagnostikatu zaion neskato baten amak, eskerrak eman dizkio elkarteari, eta berretsi du beharrezkoa dela ikastetxeetan erizain profesionalaren figura ezartzea. “Haur askok zuzeneko esku-hartzeak behar dituzte ikastetxeetan, eta erantzukizun hori bidegabeki irakasleen gain dago. Figura hori inplementatu behar dugu, haur guztiek baldintza berdinetan hezkuntza eta osasuna eskura izan dezaten; gaur egun, beren eskubideak urratuta ikusten dituzte”.

Diabetesaren Mundu Eguna dela eta, Nafarroako Parlamentuak bere egoitza kolore urdinez argiztatu zuen astelehenean, azaroak 14.

Anadiko ordezkariek Mahaiko, Eledunen Batzarreko eta Osasun Batzordeko kideekin batera ateratako argazki batekin amaitu da ekitaldia, eta talde guztietako legebiltzarkideak ere bertan izan dira.

Diabetesaren Nafarroako Elkartea (ANADI) 1983an sortu zen, gaixotasun hori duten pertsonen bizi-kalitatea osasun-laguntza egoki baten bidez nahiz hezkuntza diabetologiko egoki baten bidez hobetzeko xedez, gaixo horien erabateko gizarteratzea lortzera bideratutako prozesu baten baitan.