Nafarroako Parlamentuan, Pobreziaren eta Desberdinkeriaren aurkako Ituna (2021-2030) sinatzeko ekitaldia egin da gaur. 2019. urtean, Pobrezia Desagerraraztearen aldeko Nazioarteko Eguna zela-eta Nafarroako Parlamentuaren eta Nafarroako Gizarte Entitateen Plataformaren artean lortutako akordioaren emaitza da agiria, eta 2007an hartutako konpromisoak gaurkotu eta zabaltzen ditu.

Ekitaldia Osoko Bilkuren aretoan egin da, eta bertan izan dira Mahaiko eta Eledunen Batzarreko kideak, Eskubide Sozialetako Batzordeko eledunak eta Gizarte Entitateen Plataforma osatzen duten entitate guztietako ordezkaritza bat.

Gizarte Eskubideen Batzordeko presidente Arantza Biurrunek eman dio hasiera ekitaldiari, eta “pobrezia eta desberdinkeria desagerrarazteko eta gizarte-kohesioa hobetzeko agindu etiko, sozial, politiko eta ekonomikoa”ren esparruan kokatu du ituna. Helburu du 2030eko Agendan jasotako helburuetan ezarritako norabidean aurrera egitea.

Horri dagokionez, Biurrunek gizarte osasungarriagoa eraikitzearen, haurrei aukera bat ematearen eta aporofobia desagerraraztearen alde egin du. “Tresnak baditugu, borondatea badugu eta ibilbide-orri bat ere badugu. Zor bat kitatzeko gonbita egiten dut, pobreziaren eta desberdinkeriaren ikaragarrizko amildegian daudenekin —edo hartara eraman ditugunekin— daukagun zorra”.

Ondoren, Mariluz Sanzek, Gizarte Entitateen Plataformaren ordezkari gisa, azpimarratu du Pobreziaren eta Desberdinkeriaren aurkako Nafarroako Itunak bere buruari asmo handiko jomuga bat ezarri diola, alegia, Nafarroarentzat 2030erako ibilbide-orria izatearena; izan ere, “Nafarroako Gobernuak garapen jasangarriko helburuak ezartzeko gida gisa balioko du, eta, gainera, dokumentuan sinatutako konpromisoei dagokienez egindako aurrerapenak egiaztatuko dituzten ebaluazio programatuak egiteko oinarriak ezarriko ditu”.

Haren helburuak “asmo handiagokoak” zirela aitortu ondoren, Sanzek “egokitzat” jo ditu negoziazio-prozesua eta emaitza, hainbat hilabeteren ondoren, eta eskertu egin du Parlamentuak dokumentu “zabal eta oso” hau garatzeko hartutako konpromisoa; izan ere, dokumentuak pertsona guztiei erantzun nahi die, eta ekonomia sozial eta solidarioa proposatzen du helburu horretarako tresna gisa.

Amaitzeko, Gizarte Entitateen Plataformaren eledunak adierazi duenez, itun horrek frogatzen du “pobreziaren eta desberdinkeriaren aurkako borroka Nafarroako gizarte osoak partekatzen duen helburu bat dela. Gizarte Entitateen Plataformaren egitekoa izanen da ituna betetzen dela zaintzea, inor atzera utzi gabe”.

Jarraian, Unai Hualde Nafarroako Parlamentuko lehendakariak, Eskubide Sozialetako Batzordeko eledun diren Jorge Esparzak (Navarra Suma), Nuria Medinak (PSN), Isabel Aramburuk (Geroa Bai), Patricia Peralesek (EH Bildu), Ainhoa Aznárezek (Podemos-Ahal Dugu) eta Marisa de Simónek (Izquierda-Ezkerra), eta Gizarte Entitateen Plataforma osatzen duten entitateetako ordezkari Mari Luz Sanzek (CERMIN), Francisco Javier Abadek (GGKE Koordinakundea), Natalia Zarok (REAS) eta Alberto Urteagak (Pobreziaren eta Gizarte-bazterketaren aurkako Nafarroako Sarea) dokumentua sinatu dute.

Ekitaldia Parlamentuko lehendakari Unai Hualdek itxi du, eta Pobreziaren eta Desberdinkeriaren aurkako Nafarroako Itunaren balioa nabarmendu du, pobrezia desagerrarazteko eta gizarte-kohesioa hobetzeko esparru eta tresna gisa, hori baita "erantzukizun politikoak ditugun guztion lehentasuna".

Hala, COVID-19aren pandemiak, konfinamenduak eta geldialdi ekonomikoak akordio hori “are beharrezkoago” egin dutela azpimarratu ondoren, Hualdek azpimarratu du “desberdintasun politikoetatik urrun, alderdi politikoak eta parlamentu hau akordio hori hemendik 2030era arte gauzatzeko konpromisoa hartzen duen akordio bat lortu dela. Itun hori harago doa, bete beharrekoa delako, edozein garela ere parlamentu honetan eta Nafarroako Gobernuan ordezkatuta gaudenok”.

Horri buruz, Parlamentuko lehendakariak hauxe adierazi du: “Nafar gizartea beti nabarmendu da solidarioa izateagatik, eta “gizarte-ehundura indartsua dauka, beste erakunde batzuekin batera lanean diharduena aporofobiarik gabeko Nafarroa lortzeko”.

Unai Hualdek, amaitzeko, eskerrak eman dizkie gizarte entitateei eta talde parlamentarioetako ordezkariei egindako lanagatik, eta adierazi du “gizarte hobea, kohesionatuagoa eta desberdinkeriarik gabekoa eraikitzeko, bultzada eman behar diegu ukituak suertatzen diren dimentsio guztiak kontuan hartuko dituzten politika eraginkorrei, eta beharrezkoak diren baliabide guztiez hornitu behar ditugu”.

Itun honetan jasotako neurrien garapenaren jarraipena egiteko, jarraipen-batzorde bat ezartzen da. Batzorde hori sei hilean behin bilduko da, eta honako kide hauek izanen ditu: batzordeburua, talde parlamentario bakoitzeko ordezkari bat, Gizarte Entitateen Plataforma osatzen duten erakundeetako bakoitzaren ordezkari bat eta une horretan Idazkaritza Teknikoaz arduratzen den pertsona.

Gizarte Entitateen Plataforma (PES) honako hauek osatzen dute: Desgaitasuna duten Pertsonak ordezkatzen dituzten Entitateen Nafarroako Batzordea (CERMIN), Ekonomia Alternatibo eta Solidarioaren Sarea (REAS), Garapenerako Gobernuz Kanpoko Erakundeen Koordinakundea (CONGDN) eta Pobreziaren eta Gizarte-bazterketaren aurkako Nafarroako Sarea.