Unai Hualde Nafarroako Parlamentuko lehendakariak Giza eskubideen defendatzaile afganiarrak erakusketa inauguratu du gaur eguerdian. Ixone Sádaba artista bisualaren 7 argazkik osatutako bilduma da, El Salvador Elkartasuna Kolektiboak eta 14 Lawyers Elkarteak antolatuta.

Hasierako hitzaldian, Unai Hualdek Afganistango emakume abokatuei “aurpegia eta izena jartzearen garrantzia” azpimarratu du, “emakumeen eskubideen aldeko borrokan eta giza eskubideen aldeko borrokan egiten duten lana ikusarazteko”. Ezinbesteko lan hori, Talibanak boterera iristean jomuga bihurtu da eta “errepresalia larrien eraginpean” daude.

Zentzu horretan, Legebiltzarreko lehendakariak Afganistanen gertatzen ari den “giza eskubideen urraketa” salatu du, eta “abokatuen independentzia defendatzen duen, eskubideen urraketa salatzen duen eta abokatuei babesa ematen dien” 14 Lawyersen lana aitortu du. Ildo horretan, Ganberaren konpromisoa berretsi du elkarteekin eta erakunde publikoekin elkarlanean jarraitzeko, giza eskubideen defentsan eta edozein urraketaren aurkako salaketan ezinbestekoa den lanean.

Era berean, Hualdek gaineratu du “ez dela garai ona giza eskubideentzat”, eta, Ukrainaren edo Palestinaren egoera aipatu ondoren, adierazi du ez dagoela horren urrun joan beharrik, Tenerifen izandako hilketa matxista salatzeko Parlamentuak inaugurazioa baino minutu batzuk lehenago egin duen kontzentrazioari buruz. “14 emakume erail dituzte aurten, eta gizarteak bat egin behar du gaitz honen aurka borrokatzeko. Hezkuntzatik, elkartasunetik eta, batez ere, berdintasunetik”.

Jarraian, 14 Lawyers elkarteko presidente Ignacio Rodríguezek eskerrak eman dizkio Nafarroako Parlamentuari, “begirada fokua galdu duen zerbaitetan jartzeagatik eta Nafarroako herritarrei giza eskubideak defendatzen dituztenei babesa ematearen garrantziaz hausnartzeko aukera emateagatik, bai eta justizia unibertsala eta asilo-eskubidea bezalako alderdi garrantzitsuak indartzeko beharraz ere, gainbehera nabarmenean baitaude”.

Rodriguezek gaineratu duenez, argazki-erakusketa honen helburua da “fokua bi alderditan jartzea: alde batetik, defendatzen dituztenak defendatzean, eta, bestetik, asilorako eskubidea defendatzean”. “14 Lawyersentzat oso garrantzitsua da abokatu horien istorioak nola kontatzen diren. Errespetuz eta ezagutzaz hurbildu. Bestalde, gaiak sentsibilitatez, zorroztasunez eta zintzotasunez lantzeaz gain, oso esparru desberdinetako profesionalen laguntza ere badugu horretarako. Eta horren adibide garbia da aurkezten dizuegun argazki-erakusketa”.

Giza eskubideen defendatzaile afganiarrak erakusketa Ixone Sádabak egindako 7 erretratuk osatzen dute, 110 x 170cm-koak, kutxa amerikar beltzean kokatuak. Maiatzaren 31ra arte egongo da zabalik, 10:00etatik 20:00etara, astelehenetik ostiralera, ostegunetan izan ezik. Larunbatetan 11:30etatik 14:00etara.

Ohikoa denez, erakusketa berri hau Kultur Atrio programaren barruan kokatzen da. Programa horren bidez, 2016ko otsailaz geroztik, Legebiltzarrak ateak ireki eta adierazpen artistiko eta dibulgatibo anitzei babesa eman die.

Erakusketaren irekiera Ganberaren egoitzako atalondoan egin da eta, besteak beste, bertan izan dira Yolanda Ibáñez, Parlamentuko bigarren lehendakariordea, Maiorga Ramírez, bigarren idazkaria, Isabel Olave, Iñaki Iriarte (Navarra Suma), Arantza Biurrun, Virginia Magdaleno (PSN), Uxue Barkos, Isabel Aranburu (Geroa Bai), Txomin González (EH Bildu) eta Marisa de Simón (Izquierda-Ezkerra).