PPN eta Vox taldeek eskatuta, Osasunari buruzko Osoko Bilkura monografikoa ostiral honetan, maiatzaren 31n ospatuko da (09:30). Helburua da “osasungintzaren kudeaketaren akatsak aztertzea, Departamentuaren historiako aurrekonturik handiena (2023an 2.019,65 milioi) izanik ere, plangintza-faltak, itxaron-zerrenden areagotzeak eta mediku eskasiak arazo ugari sortzen baititu”.

Mahaiak, Eledunen Batzarrari entzun ondoren, gaur onetsi dituen arauei jarraiki, talde parlamentarioen eta foru parlamentarien elkarteen eledunek txanda bakarra izanen dute, eserleku gehien dituenetik hasi eta gutxien dituenekin bukatzeko (PPNk hartuko du hitza lehenengo, ekimena berak proposatu baitu). 20 minutu izango dituzte beren jarrera azaltzeko, ebazpen-proposamenak defendatzeko eta gainerako taldeek aurkeztutakoei buruzko iritzia emateko.

Txanda hori bukatuta, Nafarroako Gobernuaren ordezkari bat mintzatzen ahalko da, eztabaidagai diren gaien inguruko bere jarrera azaltze aldera, 20 minutuz.

Eztabaida amaitutakoan, ebazpen-proposamenak bozkatuko dira; lehenik eta behin, proposamena egin duenarenak (edo bienak, txanda partekatzen badute), eta, ondoren, gainerako alderdienak, handienetik txikienera.

Mahaiari erabaki proposamenak aurkezteko epea aurreko egunean, maiatzaren 30ean, 12:00etan amaituko da. Talde parlamentario edo parlamentarien elkarte bakoitzak gehienez ere hiru proposamen aurkeztu ahalko ditu. Eztabaidan zehar in voce zuzenketak aurkezteko aukera izanen da, baldin eta haien xedea errakuntza edo akats teknikoak, terminologiakoak edo gramatikakoak zuzentzea baldin bada.