Goizean goiz hasita, Segurtasun eta emergentzia kidegoetako suizidioaren prebentzioari buruzko Jardunaldia egiten ari da Nafarroako Parlamentuan, CCOO eta Sindicato Unificado de Policía (SUP) sindikatuek antolatuta. Jardunaldiak azpimarratzen du “gizartearen arazo hau prebentzioaren eta laguntzaren ikuspuntutik” aztertzeko beharra.

Hala mintzatu da Parlamentuko lehendakariorde Yolanda Ibañez andrea. Ekitaldiari hasiera emateko mintzaldian nabarmendu du “hitz egitearen eta entzutearen garrantzia, besteak beste, suizidioaren tabua hausteko; izan ere, heriotza gehien eragiten duen arrazoia da Espainian, trafiko istripuen gainetik ere. Pausoak ematen ari dira, gai horretako adituen laguntzarekin, eta ahaztu gabe iaz 43 suizidio izan zirela Nafarroan eta 3.800 Espainian.

Horren haritik, lehendakariordeak erakundeek abian jarritako sentsibilizaziorako kanpainak aipatu ditu, bai eta Jokabide Suiziden Prebentzio eta Arretarako Erakunde arteko Koordinazio Batzordearen lana. Nafarroako Gobernuak bultzatutako organo horrek, polizia-lanaren nekazaritzako jardunbide egokien gida prestatzen laguntzeaz gain, arazo honen inguruan eginiko lanak eta prozedurak aurkeztu ditu pasa den irailean.  Horiek guztiak erreferentziazko dokumentuak dira”.

Amaitzeko, Yolanda Ibáñezek Nafarroako Parlamentuak iragan irailaren 6an Suizidioaren Prebentziorako Mundu Egunaren karietara onetsi zuen adierazpen instituzionala ekarri du gogora. Haren bidez “prestakuntza eta sentsibilizazioa bultzatzen dira ikuskera berritzaile, integral eta multisektorial batetik, bai eta prebentzio-estrategiei eta albisteak modu arduratsuan jorratzeari dagokienez ere”.

Jarraian, Gobernuak Nafarroan duen ordezkari José Luis Arasti jauna mintzatu da bere ustez, “populazioaren ehuneko handi batek pairatzen dituen osasun mental askotarikoetako baten inguruan dauden aurreiritziez. Pandemiak ez du lagundu oreka emozionala zaintzen, eta, Espainia suizidio-tasa txikienetakoa duten Europako herrialdeetako bat bada ere, arrazoi horrek eragindako heriotzak (2019an, 3.671; horietatik 900, emakumezkoenak) errepidean gertatutakoen bikoitza da”.

 Amaitzeko, Arastik prebentzioa epe eta modu egokian optimizatzeko beharrezkoak diren tresnak izatearen alde agertu da. “Ezin dugu beste aldera begiratu, ezta polizia kidegoetan ere, horietan ere intzidentzia eta kasuistika ehundura sozialaren zati handienaren antzekoak baitira. Eskerrak ematen dizkizuet, hausnarketa zorrotzerako leiho hau irekitzeagatik”.

Jarraian, aurreikusitako lau txostenetatik lehena aurkeztu du Polizia Kidego Nazionalaren Talde Psikosozialaren arduradun eta RedAIPIS-Suizidioaren Ikerketa, Prebentzioa eta Esku-hartzea taldeko kide Javier Jiménezek.

Horren ondotik parte hartu dute Madrileko Udaleko suhiltzaile eta Papageno-Suizidioaren Prebentzioaren eta Posbentzioaren Profesionalen elkarteko kide Sergio Tubiok, Nafarroako Itxaropenaren Telefonoko zuzendari tekniko Alfonso Echávarrik eta Diario de Navarrako kazetari eta “Hablemos del suicidio” liburuaren egile Gabriel Gonzálezek.

Jardunaldiaren hasierara bertaratu den Nafarroako Gobernuko lehen lehendakariorde Javier Remírezek hartuko du parte jardunaldiari amaiera emateko.