Osoko Bilkurak gaur aho batez onetsi duen ebazpen batean, Parlamentuak Nafarroako Gobernua premiatzen du “ijitoen herriaren historia eta kultura sar ditzan Nafarroako hezkuntza-curriculumean”.

Onetsitako ebazpenaren bigarren puntuak, berriz, Espainiako Gobernua premiatzen du “ijitoen herriaren historia eta kultura jaso ditzan hezkuntza-curriculumean, bere eskumenen esparruan”.

Halaber, Geroa Bai eta Podemos-Ahal Dugu taldeen eskariz gehitu den hirugarren atalean, Legebiltzarrak “aintzat hartzen du La Majarí, La Romaní, Gaz Kaló Federazioa edo Ijitoen Idazkaritza bezalako erakundeek haur eta gazte ijitoen hezkuntza-sustapenaren alde egindako lana”.

Baztertu egin da PPNk in voce aurkeztutako zuzenketa, Foru Gobernuari eskatzen ziona “arlo anitzeko lantalde bat sor dezala, erabiliko diren material didaktikoak taxutzeko, material horiek 2017-2018 ikasturterako egon daitezen Nafarroako ikasleen eskura”. UPNren babesa ez da nahikoa izan, Geroa Bai, EH Bildu eta I-Ek aurka bozkatu eta Podemos-Ahal Dugu eta PSN abstenitu egin baitira.

UPN, Geroa Bai, EH Bildu, Podemos-Ahal Dugu, PSN, PPN eta I-E taldeek sustatutako ebazpenaren zioen azalpenean adierazten denez, ijitoen herriaren kultura eta historia curriculumean jasotzea “aintzatespen soziala” izanen da, eta, “motibatzeko” elementua izateaz gain, “aurreiritziak gainditzen eta hezkuntza-sistema inklusibo eta integratzaile bat eratzen” lagunduko du.

• www.nafarroakoparlamentua.eus
• Mozioa (81. NPAO, 2017-06-02koa)