Nafarroako Parlamentuko lehendakari Unai Hualdek harrera egin die gaur bere bulego ofizialean Burlatako Artxiboaren aldeko Plataformako Nieves Del Río, Francisco Javier Cirauqui, Pello Iraizoz eta Juana Mari Goñi ordezkariei.

Bileran, Juana Mari Goñik bere “egonezina” adierazi du, abenduko uholdeak ukitutako dokumentazioak (XVI. mendekotik iritsi da) duen egoeragatik. Ikusirik Udalak kontratatutako adituaren txostena, berretsi du “zalantzak” daudela abiarazi den berreskuratze-metodoaz (izozketa). Horiek horrela, “beste aukerak jorratzera” premiatzen dute.

“Hasieratik zalantzan jarri dugu Udalak, bigarrenen iritziak bildu ordez, presako kontratazioa egitea Madrilgo zaharberritzaile batekin, Nafarroako Artxibo Nagusiak gaitasuna zuen bakartzat aurkeztua. Denborak egiaztatu duenez, ez pertsona, ez metodoa ere ez ziren egokiak. Azkenean, Udalak men egin dio laginketa bat lizitatzeari, dokumentazioaren egoera aztertzeko eta desizozketa prestatzeko (duela bederatzi hilabete Landabengo nabe batean dago); kasuko profesionalaren balorazioari jarraikiz, eragiketak 383.507 euroko kostua du. Kultura Ministerioarekin eta hainbat enpresa espezializaturekin kontsultatu ondoren, aurrekontu neurrigabea dela uste dugu”.

Bestalde, Unai Hualdek adierazi du, udal-esparruari dagozkion auziak ukatu gabe, plataformak emandako eskaerak eta informazioa Kultura Batzordean legebiltzar-taldeen ordezkariei helaraziko dizkiela, egoeraz interesa dezaten eta, hala badagokio, plataformarekin harremanetan jar daitezen egokien iruditzen zaien formatuan.