Unai Hualde Nafarroako Parlamentuko Lehendakariak Valentín Fortún ONCEren Nafarroako lurralde-ordezkariaren eta Pilar Herrero Foru Erkidegoko lurralde-kontseiluaren presidentearen eskutik jaso du Itsuen Erakunde Nazionalak datorren martxoaren 1ean Konstituzioaren erreformari eskainiko dion kupoia. Aldaketa horren ondorioz, "urritua" terminoaren ordez, "ezgaitasuna duten pertsonak" jarriko da.

“Lorpen honetara iristeko herritar askok 20 urtez egindako ahalegina aitortzeko” helburua du, Valentín Fortunen arabera, kupoia Nafarroako Parlamentuko Lehendakariari emateko protokolo-ekitaldiak. Mariluz Sanz CERMINeko presidentea ere bertan izan da.

ONCEko lurralde-ordezkariak azpimarratu duenez, "aldaketa ez da arrazoi politiko, ekonomiko edo ideologikoengatik egin, herritarren eta ezgaitasuna duten ia lau milioi eta erdi pertsonaren ahaleginetik sortu da. Konstituzioaren lehen erreforma soziala bultzatu dugu".

Unai Hualdek, bere aldetik, uste du "ezgaitasuna duten pertsonak" terminoaren konstituzionalizazioak esparru horretako asoziazionismoaren aldarrikapen historiko bat jasotzen duela, eta horrekin Nafarroako Parlamentuak "lankidetza estua eta konpromiso zorrotza" izan duela beti "beren eskubideen bermearekin eta defentsarekin".

Arau gorena eguneratu ondoren, ONCEk martxoaren 1eko kupoia Espainiako Konstituzioaren 49. artikuluaren erreforma ospatzeko erabiliko du. 13,5 milioi kupoi argitaratuko ditu bere paperik onenean, "Zuen ilusioari esker, pertsonak gara" lelopean.

ONCE Gizarte Taldeak 73.000 langile baino gehiago ditu ( % 61ek desgaitasunen bat du), eta 85 urte baino gehiago daramatza eskubideen aitorpen eraginkorra aldarrikatzen, "berdintasunaren eta aniztasunarekiko errespetuaren" ikuspegitik.