Nafarroako Parlamentuan gaur Emakumea, Indarkeria eta Desgaitasuna izeneko jardunaldia egin da, Desgaitasuna duten Pertsonak ordezkatzen dituzten Erakundeen Nafarroako Batzordeak (CERMIN) antolatuta. Ainhoa Aznárezek parte hartu du, eta beharrezkotzat jo du “modu koordinatu eta estrategikoan borrokatzea, batetik erasoak eta bestetik desgaitasuna direla-eta ezkutaketa bikoitza jasaten duen kolektibo horren heren baten kontrako tratu txar fisiko, psikologiko eta sexualak desagerrarazteko”.

Inaugurazioko hitzaldian lehendakariak eskatu du presako neurriak har daitezela “hitza emanez, izena jarriz eta zenbakiak aztertuz, desgaitasuna duten emakumeak ahanzturatik ateratzeko eta jasaten duten arrisku eta babesgabetasun bereziko egoerari konponbidea emateko, bortxazko tratua ematen dien pertsona bera baitute zaintzaile”.

Ildo berean sakonduz, “erasoen portzentajea desgaitasunik gabeko emakumeena ‘bi halako’ duen talde horren zaurgarritasun handiagoari buelta emateko”, lehendakariak deia egin du “haien babeserako taxututako zerbitzu eta baliabideetarako irispidea errazteko, oraindik ere egokitzapen akastuna baitute”.

Lehendakariak gogorarazi du Nafarroako Parlamentuak dagoeneko genero-indarkeriaren gaiari heldu diola hainbat ikuspuntutatik, eta, bukatzeko, Cermin elkartea zoriondu du, egoera salatzeko eta gizarteari kontzientzia harrarazteko egiten duen lanagatik. “Badugu garaia irizpideak eta hizkerak bateratzeko, ahotsak eta eskuak elkartzeko, desgaitasuna duten pertsonen kontrako eraso sexistak ere desagerrarazte aldera, oraingoan are arrazoi handiagoz”.

Jardunaldi horretan Cerminek hainbat eskumen-eremutan garatzen ari diren ekimenak aurkeztu ditu. Helburua da, azkenean, desgaitasuna duten eta genero-indarkeriaren biktima diren emakumeentzako gizarte-babesa behar adina bermatuta ote dagoen ebaluatzea.

Horretarako, Cerminek laguntzaile izan ditu Ana Peláez, Cermi Emakumeak fundazioko lehendakaria, ekintzailea eta desgaitasuna duten emakumeen mugimendu feministaren bultzatzailea; Esther Castellanos, Cermi Emakumeak fundazioko koordinatzailea; Pilar Baigorri, Nafarroako Berdintasunerako Institutuko Emakumeen kontrako Indarkeriaren Ataleko burua; Miriam Herrero, Aragoiko CERMIko Emakumeen Batzordeko lehendakaria; Edurne Jauregui, Nafarroako COCEMFEko kudeatzailea; Sara Hernández, COCEMFEko berdintasuneko teknikaria; eta Susana Castrillo, ANFASeko zahartze aktiboko, autogestioko eta bizitza independenterako laguntzako teknikaria.

Desgaitasunaren arloan lan egiten duten emakume horien ikuspegia jasotzeaz gain, testigantza jasotzeko tarte bat gorde zaie adimen-desgaitasuna duten lau emakumeri. Lehen pertsonan azaldu dute zer-nolako premiak, itxaropenak eta eskakizunak dituzten gai horri dagokionez.

Honako hauek mintzatu dira jardunaldiari amaiera emateko: Edurne Eguino, Iruñeko Udaleko Gizarte Ekintzako eta Garapen Komunitarioko Alorreko zinegotzi eskuordea; Inés Francés, Pertsonen Autonomiarako eta Garapenerako Nafarroako Agentziako zuzendari kudeatzailea; eta Mertxe Leránoz, Nafarroako Berdintasunerako Institutuko zuzendari kudeatzailea.

Desgaitasuna duten eta genero-indarkeriaren biktima diren emakumeentzako laguntza inklusiboa eta eskuragarria al da? Ba al dago behar adina baliabide eta neurri espezializatu emakume horiei banaka laguntza integrala emateko? Politika publikoek behar adinako bermea eskaintzen dute? Horrelako galderei erantzuteko aukera izan da jardunaldian zehar.

Jardunaldi horren bidez, Cerminek herritarren kontzientzia piztu nahi du, aski baliabide espezializatu jarri beharraz ohartaraziz, eragileek erantzun egokia eta kalitatezkoa eman diezaieten desgaitasuna duten emakumeei, zerbitzuak eskuratzeko eta beren eskubideak bete-betean erabiltzeko aukera-berdintasunaren printzipioa errespetatuz.

CERMINeko lehendakari M. Luz Sanzek inauguratu du jardunaldia, ondoan zituela Ainhoa Aznárez, Nafarroako Parlamentuko lehendakaria, eta Juan Moreno, CaixaBank-eko Negozio Arloaren zuzendaria.