Nafarroako Gobernuko Lurralde Kohesiorako kontseilariak, Bernardo Cirizak, "despopulazioari buruzko zeharkako estrategia bat burutzea" jarri du helburutzat legegintzaldi honetarako, eta adierazi du, datozen urteetan "Nafarroako Gobernuaren eta Parlamentuaren erronka izanen dela despopulazioari buruzko lege bat onartzea".

Kontrolerako osoko bilkuran PSNk egindako interpelazio bati erantzunez baieztatu duenez, "erronka nagusia landa-eremuetako despopulazioa saihestea da, zerbitzu egokiak emanez, bai eta biztanleriaren batez besteko adina gaztetzea, jaiotza-tasan eragingo duten politiken bidez; izan ere, bi politika horietan migratzaileek berebiziko garrantzia dute, eta politika ekonomikoek eta lan-merkatukoek koherentziaz jokatu behar dute".

Zereginen artean, kontseilariak honako hauek aipatu ditu: adinekoen etxez etxeko arretaren eredua lehenestearen garrantzia; egoitza-arretaren ereduan aldaketak egitea, osasun-sistematik eta azpiegitura txiki eta humanizatuagoetatik hurbilago dagoen arretaren alde eginez; adinekoen presentzia eta parte-hartze aktiboa areagotzea haiengan eragina duten politikak erabakitzeko orduan; adinekoen nahi gabeko bakardadearen aurkako borroka, edo enpresetan belaunaldien arteko ordezkapenari laguntzea.

Bernardo Cirizak adierazi duenez, "gobernu hau oso sentibera da udalerrien despopulazioarekin eta bertako bizilagunen eguneroko arazoekin", eta azaldu du Exekutiboak bost orga sartuko dituela errepideen katalogoan, orain eskumenik ez duten beste bide batzuekin batera, "etorkizunean gorde ahal izateko".

Kontseilariaren hitzetan “hau da errepideak zerbitzu publiko gisa hobetzearen aldeko apustua egitea", eta "Nafarroak ez du inor atzean utzi behar lurraldeari dagokionez, ez kontzejurik, ez udalerririk, ez pertsonarik. Nafarroak lurralde-garapen jasangarri eta polizentrikoaren alde egiten du. Horrela bakarrik egingo diogu aurre despopulazioari”, berretsi du.

Jorge Aguirrek (PSN) azpimarratu du legegintzaldiaren hasieran Maria Chivite presidenteak Lurralde Kohesiorako Departamentua sortzea erabaki izanaren garrantzia, "Nafarroako Gobernuak aurre egin beharreko erronkak zehaztuz”. Horren harira, adierazi duenez, "erronka demografikoa despopulaziotik haratago doa, aurre egin behar diogun fenomenoa da, baina ez bakarra. Nafarroako Gobernuko arlo guztiei eragiten dien zeharkako gaia da".

María Jesús Valdemorosek (Navarra Suma) adierazi duenez, "benetako erronka, jasangarritasun demografikoarena, ernalkuntza-tasak berreskuratzea da, belaunaldi-ordezkapena ziurtatuko duten balioetaraino. Jasangarritasun demografikoaren aldeko itunak lortzeko lan egin beharko genuke, arazoaren kontzientzia eta seme-alabak haztearen aldeko lan-esparrua sortzen laguntzeko. Epe ertain eta luzeko planteamenduek huts egiten dute hain epe luzeko ibilbidean bidea egin dezaketen tresnen erabileran", esan du.

Pablo Azconak (Geroa Bai) azpimarratu duenez, "Ongizate Estatuaren iraunkortasunak despopulazioaren erronkei aurre egitea eskatzen du. Erronka demografikoak ekintza politikotik erantzun berriak ematea eskatzen du, landa-eremuetako despopulazioa saihesteko, biztanleria gaztetzeko eta adinekoen bizi-baldintzak hobetzen laguntzeko", adierazi du.

Laura Aznalek (EH Bildu) azpimarratu duenez, "talde guztiak ados gaude Nafarroako erronka demografikoaren zeharkako izaerarekin", eta "landa-eremuei kalitatezko zerbitzuak eman behar zaizkie, horregatik lan egiten dugu tokiko ogasunen finantziazioan, eskola-jantokietan, eskualdeetako ospitaleetan".

Mikel Builek (Podemos-Ahal Dugu) adierazi du ugalkortasunari heltzeko etxebizitzaren prezioaz, soldatez edo prekarietateaz ere hitz egin behar dela. Gainera, ohartarazi duenez, "2035ean pentsioak kobratzen dituzten bi belaunaldi izango ditugu, eta  horregatik, gure kutxaren egoera aldatzeko garaia da, fiskalitate handinahiagoduna eta europarragoa aplikatzeko garaia da".

Azkenik, Marisa de Simónek (Izquierda-Ezkerra) ohartarazi duenez, "Nafarroako egoera demografikoa kezkagarria da lurralde kohesioari dagokionez. Ezer berririk egiten ez bada, hurrengo urteetarako aurreikuspena da Iruñea eta Iruñerria ez diren Nafarroako eremuak, hazi beharrean, txikitu egingo direla. Pertsona guztiek, bizi diren lekuan bizi direla, baldintza berberak eta zerbitzuetarako sarbide bera izan behar dute".