Nafarroako Parlamentuaren osoko bilkurak mozio bat baztertu du gaur, zeinaren bidez Nafarroako Gobernua premiatzen baitzen “2023ko Nafarroako Aurrekontu Orokorren izapidetzean zerga erreformari buruzko foru lege proiektu bat aurkez zezan, PFEZaren kargen eskalako likidazio oinarrien deflaktazioa, inflazioaren araberakoa, edukiko zuena”.

Baztertutako mozioak bigarren atal bat zuen, Navarra Sumaren eskariz gehitua, Nafarroako Gobernua premiatzen zuena “aurreko puntuak aipatzen duen deflaktazioa PFEZaren tarifaren deflaktazio progresiboa izan zedila eskatzeko, %6-%8,5 bitartekoa errenta baxuentzat eta errenta ertainentzat, 2022ko urtarrilaren 1etik atzeraeraginez aplikatuko zena. Gainera, neurri horrek atxikipenen taulan eragina izanen zuen araudia onesten denetik”. Gehitzeko zuzenketa I-E ekimenaren titularrak onartu egin du.

Zioen azalpenean, Izquierda-Ezkerra talde parlamentarioak sustatutako mozioak premiazkotzat jotzen du “hainbat eremutan neurriak” hartzea, kontuan izanda “inflazioaren (% 10,8) eta soldaten (% 2,56) arteko arraila 8 puntutik gorakoa dela (gehieneko historikoa), erosteko ahalmenaren galera saihesteko eta, horren ondorioz, biztanle gehienen pobretzea saihesteko”.

Horretarako, PFEZaren tarifan deflaktazioa aplikatzearen alde egiten zen. Tarifa horren diru-bilketa batez ere lanaren errentetatik iristen denez, haren deflaktazioa “guztiz neurri beharrezkotzat” jotzen du sustatzaileak, “Nafarroako herritar askoren narriadura ekonomikoa ez areagotzeko”.

Testuinguru horretan, gogorarazten da “1984an KPIa % 11,3 hazi zenean, soldatak % 7,8 igo zirela. Orduan aldea 3,5 puntukoa izan zen, baina oraingoak, ordea, zifra hori aise bikoizten du”.

• www.nafarroakoparlamentua.eus

• Mozioa (95. NPAO, 2022-09-06koa)