Lehendakaritza eta Berdintasun Batzordeak Boluntariotzari buruzko foru-lege proiektuari buruzko irizpena onetsi du asteazkenean. Testu horrek ekintza solidarioko modu berriak biltzen ditu, modu digitala barne, eta plangintza-, prestakuntza- eta koordinazio-tresnak barne hartzen ditu, hala nola Boluntariotzaren Sarea eta Jardun Boluntarioaren Eskola.

Gobernuak bultzatutako lege-proiektuaren xedea da Foru Komunitateko ekintza boluntarioaren esparru arautzailea eguneratzea eta antolatzea. Esparru hori orain arte 2/1998 Foru Legeari lotuta egon da, duela bi hamarkada baino gehiagotik indarrean.

Horretarako, testu berriak boluntariotzaren erregulazio integrala ezartzen du, eta, horretarako, kontzeptua, printzipioak eta jarduketa-esparruak definitzen ditu, eta, aldi berean, boluntarioen, jarduera hori sustatzen duten entitateen eta xede diren pertsonen eskubideak eta betebeharrak zehazten ditu.

Proiektuak boluntariotzak azken urteetan izandako bilakaera aitortzen du, eta parte hartzeko zenbait modalitate gehitzen ditu, aurrez aurreko boluntariotza eta boluntariotza digitala barne, bai eta formula egonkorrak eta puntualak edo proiektu zehatzei lotutakoak ere.

Aribideko arau-erreformarekin, ikuspegi inklusiboa eta genero-ikuspegia indartzen dira, eta, aldi berean, tradizionalki jardun boluntarioaren hartzaile izan diren kolektiboen parte-hartze aktiboa sustatzen da, gizarte-partaidetzako eragile gisa duten inplikazioa bultzatuz.

Esparru horretan, boluntariotzak gizarte-kohesiorako, herritarren partaidetzarako eta komunitate-sarea indartzeko tresna gisa duen zeregina nabarmentzen da, eta administrazio publikoen eta gizarte-entitateen arteko koordinazio- eta lankidetza-printzipioak ezartzen dira.

Aurreikusitako tresnen artean, Nafarroako Boluntariotzaren Plana nabarmentzen da, tresna estrategikoa arlo horretako politika publikoak planifikatzeko, bultzatzeko eta bideratzeko.

Esparru horretan, eta entitateen elkartrukerako mekanismoak, koordinazio instituzionala eta baterako ekimenen garapena optimizatzeko asmoz, Nafarroako Boluntariotzaren Sarea ere sustatzen da, administrazio publikoen, boluntariotza-entitateen eta jardun boluntarioaren sustapenean inplikatutako beste eragile batzuen arteko lankidetza-tresna gisa ulertuta.

Testuak boluntarioen prestakuntza eta aintzatespena indartzeko neurriak ere aurreikusten ditu, kasu honetan Jardun Boluntarioaren Eskola sortuz. Entitateak eta boluntarioak gaitzera eta ezarritako programen profesionalizazioa eta kalitatea sustatzera bideratutako entitatea da.

Aldi berean, Boluntariotza-entitateen Erregistroa arautzeaz arduratzen da araua, bere jarduera Foru Komunitatean garatzen duen elkarte-sarea antolatzera eta ikusaraztera bideratutako inbentario bat, non Nafarroatik kanpoko boluntariotza-programen sustapena ere sartzen baita.

Erregistroak hezkuntza-sistemarekiko lankidetza bultzatzera joko duten neurriak sustatzetik ekinen dio bere misioari, eta boluntariotza korporatiboa sustatzen lagundu beharko du, besteak beste, ekimen solidarioen garapenean gizarte-eremu desberdinen inplikazioa sustatuz.

Nafarroako Gobernuak urtebete izanen du erregistro hori arautzeko. Ordura arte, indarrean jarraituko du Ekintza Boluntarioko Entitateen Errolda arautzen duen maiatzaren 13ko 306/2014 Foru Aginduak.

Batzordean onartutako irizpenak bidea ematen dio, halaber, Nafarroako Boluntariotzaren Kontseiluaren erregulazioari. Kontseilu hori kontsulta- eta partaidetza-organoa da, eta administrazioen eta gizarte-entitateen arteko lankidetza bideratzea du helburu, bai eta borondatezko parte-hartze zibikoaren eremuko politika publikoen definizioan eta jarraipenean aholkuak ematea ere.

Kontseilua genero-orekaren printzipioaren arabera osatuko da (60/40), eta atxikita dagoen departamentuko titularra izanen du buru. Lehendakariorde bat izanen du, Kontseiluaren alderdi sozialak aukeratua, eta 22 kontseilukide, gehi Nafarroako ordezkaritza sindikalaren % 10 gainditzen duen sindikatu bakoitzeko ordezkari bana.

Kide gehienak boluntariotzako programak sustatzen dituzten departamentuetako ordezkariak izanen dira (7), baita boluntariotzako entitateetakoak (7) eta boluntarioak ere (5). Azken bi horiek ekitate- eta aniztasun-irizpideen arabera hautatuko dira. Gainera, 2 eserleku egonen dira esparru akademikotik, hezkuntzakotik edo profesionaletik datozen adituentzat, eta bat NUKFentzat. Agintaldia lau urtekoa izanen da.

Azkenik, testuak zenbait xedapen iragankor eta azken xedapen ditu, entitateak eta administrazio-egiturak arau-esparru berrira egokitzen direla bermatzeko.

Zehazki, Nafarroako Gobernuak urtebeteko epea izanen du, foru-lege hau indarrean jartzen denetik, boluntarioen aldeko neurri publikoak aztertzeko, eta boluntarioen jardun solidario, arduratsu eta altruista ezin izanen da ordaindutako lanagatik ordeztu.

Boluntariotza-entitateek epe hori bera izanen dute 14. artikuluan jasotako betebeharrak beren gain hartzeko, besteak beste, irisgarritasunerako eskubidea bermatzea, identifikazio-egiaztapena ematea, koordinatzaile bat izendatzea eta alten eta bajen erregistro eguneratua eramatea. Gainera, jardun boluntarioaren plan bat egin beharko dute urtebeteko epean.

Batzordean eginiko jorratze-lanean 8 zuzenketa eztabaidatu dira, eta horietatik 7 onetsi dira, denak ala denak PSN, EH Bildu, Geroa Bai eta Contigo-Zurekin taldeek sinatuta, konbinazio desberdinetan.

Irizpena eman ondoren, Nafarroako Boluntariotzari buruzko foru-lege proiektua Osoko Bilkurari aurkeztuko zaio, martxoaren 13an, behin betiko eztabaida eta bozketa egiteko.

Aranzazu Biurrun (PSN TP) izan da batzordeburu, eta bileran honako hauek izan dira: Raquel Garbayo, Marta Álvarez, Félix Zapatero, Isabel Olave (UPN TP), Úrsula Pardo, Ainhoa Unzu (PSN TP), Irati Jiménez, Oihana Gallo (EH Bildu TP), Blanca Regúlez, Mikel Asiain (Geroa Bai TP), Maribel García Malo (PPN TP), Miguel Garrido (Contigo Navarra-Zurekin Nafarroa TP) eta Emilio Jiménez (Talde Mistoa-Vox).

• https://parlamentodenavarra.eus
• Foru-lege proposamena (3. NPAO, 2026-01-16koa)
• Zuzenketak (18. NPAO, 2026-02-20koa)