Parlamentuko Osoko Bilkurak ebazpen bat onetsi du gaur, UPN, PSN, EH Bildu, Geroa Bai, PPN eta Contigo-Zurekin taldeen aldeko botoekin eta Voxen abstentzioarekin. Ebazpen horren bidez, Nafarroako Gobernuari eskatzen zaio "txosten bat egin dezala, gorrak, entzumen desgaitasuna dutenak eta gor-itsuak ordezkatzen dituzten elkarteekin lankidetzan, zeinu hizkuntza Administrazioan merezimendu gisa puntuatzeko aukerari buruz eta baloratzeko beharrezko betekizunei buruz".

Hortik aurrera, zehaztu denez, Foru Gobernuari eskatzen zaio "hala badagokio eta Funtzio Publikoko Mahai Orokorraren akordioarekin, merezimendu gisa sartzeko beharrezkoak diren arau aldaketak egin ditzala".

Azken testua PSNk eta Geroa Baik aurkeztutako eta ekimenaren titular Contigo-Zurekin taldeak onartutako ordezteko in voce zuzenketa baten emaitza da.

Zioen azalpenean, Contigo Zurekin talde parlamentarioak gorrei eta entzumen desgaitasuna dutenei zerbitzu publikoetarako sarbidea izateko eskubidea "bermatzearen" alde egiten du, eta, horregatik, zeinu hizkuntza sartzearen alde egiten du. Eskubide hori berariaz araututa dago merezimenduen dekretu berrian, 27/2007 Legean.

Adierazten denez, zeinu hizkuntza hizkuntza propioa da, bereizia eta gramatikaduna, beste edozein hizkuntzaren ezaugarri guztiak ditu eta funtzio berberak betetzen ditu.

Espainiako zeinu hizkuntzaren inguruan badihardugu, XVI. mendera egin behar dugu atzera, monje beneditarrak orduan hasi baitziren erabiltzen haur gorrei komunikatzen erakusteko.

• www.parlamentodenavarra.es/eu
• Mozioa (41. NPAO, 2024-03-15ekoa)