Parlamentuaren osoko bilkurak ebazpen bat onetsi du gaur PSNren, EH Bilduren, Geroa Bairen eta Contigo-Zurekinen aldeko botoekin eta UPNren, PPNren eta Voxen aurkakoekin, zeinaren bidez Nafarroako Gobernua premiatzen baita “2024an abian jar dezan Haur eta nerabeen arreta eta babesari buruzko maiatzaren 11ko 12/2022 Foru Legean jasotako haur eta nerabeen erakunde komunitarioak egiaztatzeko prozesua”.

Onetsitako ebazpenak bigarren atalean Nafarroako Gobernuari eskatzen dio “sustatu dezan legean jasotako profesionalen prestakuntza haur eta nerabeen babeseko metodologia komunitarioan”.

Era berean, hirugarren atalean, Exekutiboa premiatzen da “2024an sor dezan legean jasotako haurren ongizatea, arreta komunitarioa eta sareko lana sustatzeko batzordea”.

Bestalde, Nafarroako Gobernua premiatzen da “sustatu dezan legean jasotako arlo komunitarioko babes-mahaien eraketa”.

Horrez gain, Foru Exekutiboari eskatzen zaio “aurrekontuetan partida bat bateratzera, haur eta nerabeen babeseko metodologia komunitarioa garatzera bideratua”.

Azkenik, Nafarroako Parlamentuak Nafarroako Gobernua premiatzen du “zehaztu dezan Nafarroako Gobernuko zein administrazio-organok izanen duen eskumena haur eta nerabeen babeseko metodologia komunitarioaren garapena sustatu eta laguntzeko, bidenabar eginkizun hori betetzeko behar diren baliabideak emanez”.

Zioen azalpenean, EH Bildu talde parlamentarioak sustatutako ebazpenak adierazten du 12/2022 Foru Legeak haurrak eta nerabeak babesteko lan komunitarioa garatzeari eskaintzen dizkion aginduak "ez direla behar bezala aplikatzen ari", eta, horregatik, sistemak "erreaktiboegia” izaten jarraitzen duela, Familiari, Haurrei eta Nerabeei Laguntzeko II. Plan Integralean (2017-2023) aurreikusitakoa kontuan hartu gabe; plan horretan, "prebentzio- eta sustapen-izaerako estrategia komunitarioak" sustatzea planteatzen baitzen.

• www.nafarroakoparlamentua.eus
• Mozioa (5. NPAO, 2024-01-16koa)