Parlamentuaren osoko bilkurak ebazpen bat onetsi du gaur UPNren, EH Bilduren, PPNren eta Voxen aldeko botoekin eta PSNren, Geroa Bairen eta Contigo-Zurekinen abstentzioekin, zeinaren bidez Nafarroako Gobernua premiatzen baita “hiru hilabeteko epean Nafarroan itxaron-zerrendak murrizteko plan integral bat aurkez dezan, egiturazko neurriak ekarriko dituena”.

Onetsitako ebazpenak bigarren atalean Foru Exekutiboari eskatzen dio “planeko ekintzak eta itxaron-zerrenden bilakaeraren emaitzak monitorizatzen lagunduko duten adierazleen multzo bat ezartzea”.

Era berean, Gobernua premiatzen da “Osasun Departamentuaren webgunean argitara ditzan, herritar guztientzat modu irekian, plana eta adierazle horien hileroko emaitzak”. Azken bi puntuek Contigo-Zurekinen aldeko botoa jaso dute, eta gainerako taldeek botoa mantendu dute.

Zioen azalpenean, UPN talde parlamentariak sustatutako ebazpenak proba diagnostikoetarako (24.561 pertsona), ebakuntza kirurgikoetarako (8.757) eta espezialistarekin egindako lehen hitzordurako (66.612) itxaron-zerrenden areagotzea bideratzeko orain arte ezarritako neurrien "eraginkortasun eza" azpimarratu du. Horregatik, sistemaren erantzuteko gaitasuna aurrekontu-zuzkidurarekin lerrokatzeko plan espezifiko bat egin dadila proposatu da, izan ere, "Nafarroako Aurrekontu Orokorretako lau eurotik bat osasunera bideratzen da".

Horri dagokionez, eta Departamentuak epe laburrean joera iraultzeko egindako kontratazioak, deribazioak eta aparteko orduak ugaritu diren arren emaitzarik ez dagoenez, inoizko itxaron zerrendarik altuenek eragindako egoeraren larritasuna kontuan hartzeko deia egiten da, baita kudeaketaren "gardentasuna" bermatzekoa ere.

Bilakaerak zer ekarriko ote duen zain, autonomia-erkidegoetako itxaron-zerrendei dagokienez Osasun Ministerioak egiten duen aldizkako azken alderaketan, Nafarroa 5 kaskarrenen artean dago espezialistarekin lehen hitzordu bat izateko itxaron-zerrendaz bezainbatean.

• www.nafarroakoparlamentua.eus
• Mozioa (53. NPAO, 2024-04-16koa)