Parlamentuaren osoko bilkurak ebazpen bat onetsi du gaur PSNren, Geroa Bairen, EH Bilduren, Podemos-Ahal Duguren eta I-Eren aldeko botoekin eta Navarra Sumaren abstentzioarekin, zeinaren bidez Nafarroako Gobernua premiatzen baita “Nafarroako herrietan 2030eko Agendako informazioa lortzeko, Agendaren gaineko prestakuntza eskuratzeko eta Agenda betetzeko topagunetzat har ditzan liburutegiak”.

Onetsitako ebazpenak bigarren atalean Foru Exekutiboari eskatzen dio “2030eko Agendaren departamentu arteko lantaldearen esku jar ditzan Nafarroako liburutegiak, 2030eko Agendako Garapen Jasangarriko Helburuez sentsibilizatzeko eta helburu horien hedapena egiteko espazio gisa”.

Bestalde, hirugarren atalean, Gobernuari eskatzen zaio “herritarrak arlo digitalean prestatzeko espazio gisa bultza ditzan liburutegiak, herritarrek alfabetatze digitala eta informazioa lortzeko gaitasuna lor dezaten, arrakala digitala murriztea xede”.

Laugarren atalean Foru Exekutiboa premiatzen da “Nafarroako liburutegietako profesionalei 2030eko Agendaren nahiz agenda ezartzeko estrategien gaineko prestakuntza eman diezaien”.

Azkenik, Kultura eta Kirol Departamentuari eskatzen zaio “hiru hilabeteko epean Nafarroako liburutegietarako jarduketa-plan bat aurkez dezan, arrakala digitala murrizten laguntzeko bere proposamenean, azpimarra berezia jarriz toki entitateekin eduki beharreko lankidetzan eta liburuzainek kultura bitartekaritzan aritzeko beharko duten prestakuntzan”. Geroa Baik aurkeztu duen eta PSN ekimenaren titularrak onartu duen gehitzeko zuzenketa baten bidez gehitu da honako atala.

Zioen azalpenean, PSN talde parlamentarioak sustatutako ebazpenak Nafarroa Suspertu planera jotzen du, 2030eko Agendako Garapen Jasangarriko Helburuekin bat datorren dokumentu estrategikoa den aldetik, eta garapen eredu parte-hartzaile eta jasangarriak elkarbanatzen dituen bide-orri den aldetik, errespetuzko eta berdintasunezko kultura “gizarteak eratzeko funtsezko hezkuntza-printzipio gisa” aldarrikatzeko.

Testuinguru horretan, eta “eten digitala murrizte aldera”, liburutegiak teknologia berrien arloan herritarrak prestatzeko gune gisa susta daitezen eskatzen da; horrela, alfabetizazioari eta informazio-gaitasunari dagokienez ere, egungo krisi ekonomiko eta sozio-sanitarioari irtenbidea emateko bide izanik.

Azkenik, proposamena egin duenak liburutegien funtzio “bertebratzailea” defendatu du, haren ustez, bakea, ongizatea eta oparotasuna sustatzeko funtsezko eragileak baitira, hori guztia GJHetan kulturari zeharka esleitzen zaion prestakuntza-funtzioaren esparruan.

• www.nafarroakoparlamentua.eus
• Mozioa (99. NPAO, 2021-096-10ekoa)