Nafarroako Parlamentuak Bularreko Minbiziaren Nazioarteko Egunarekin bat egiteko ekitaldi instituzionala egin du gaur, eta, diagnostiko goiztiarra sustatzeko eta gizartea sentsibilizatzeko eta kontzientziatzeko antolatu duen ekitaldian talde parlamentario guztiak batu dira Sarayren lanari eta aldarrikapenei ikusgarritasuna eta aintzatespena emateko.

Hala berretsi du Unai Hualde Parlamentuko lehendakariak. Izan ere, “ezinbestekoa da emakumeek gaixotasun horri aurre egiteko beharrezko kontrol eta tratamenduak eskuratzeko aukerak areagotzea, beste gaitz askok bezala, osasun-sistema indartsu baten esparruan ikertzea eskatzen baitu”.

“Argi dago pandemiak Nafarroako osasun-sistema publikoa tenkatu duela. Legegintzaldi hau bereziki zaila izaten ari da osasunaren arloan, baina, ezberdintasun eta ñabarduren gainetik, talde parlamentario guztiak jabetu dira osasun-zerbitzu sendoa izateak duen garrantziaz. Sarayren eta gainerako erabiltzaileen arazo eta ohartarazpenei aurre egiteko formularik onenak bilatzeko lanean dihardugu, aurrekontu- edo antolaketa-neurrien bidez. Berebiziko garrantzia du osasunean eta ikerketan inbertitzeak. Lan asko dago egiteko oraindik”, berretsi du Hualdek.

Horrela, Saray zoriondu eta azken 26 urteetan, erreferentziazko erakunde gisa, pazientearengan oinarritutako arreta-eredu bat ezartzen laguntzeko eta pazienteak babestu eta laguntzeko egiten ari den lana nabarmendu ondoren, presidenteak Eledunen batzarrak hilaren 17an onartutako Adierazpen Instituzionala irakurri du, Legebiltzarrak osasun publikoko sistema indartsu baten defentsarekin duen konpromisoa berresteko.

Ondoren, María José Oraá Saray elkarteko lehendakariak gogorarazi du emakumeetan diagnostikatzen diren kartzinoma guztien % 30 bularreko minbizia dela, Espainian urtean 6.000 hildako baino gehiago eragiten dituela eta 35-50 urte bitarteko emakumeen artean heriotza-kausa nagusia dela.

“Gaixotasun larri baten aurrean gaude; urtean 34.088 kasu berri izaten dira, horietatik 410 Nafarroan (2020ko datuak). Minbiziak hilkortasunaren arrazoi nagusietako bat izaten jarraitzen du. Munduko tumorerik diagnostikatuena da. 2020an 18,1 milioi pertsonari eragin zien, eta datozen bi hamarkadetan kopurua 27 milioira igotzea aurreikusten da. Bularreko minbizia izateko probabilitatea 8 emakumetik batekoa da oraindik, eta % 20k metastasia garatuko du bizitzan zehar. 45-65 urteko adin-tartea da intzidentzia handiena duena”, Oraák esan duenez.

Lehentasun gisa paziente metastasikoen bizitza hobetzeko “ikerketan eta berrikuntzan inbertsio gehiago” egiteko konpromisoa eskatzen du Sarayk, baita itxaron-zerrendak desagertzea, pazientearengan zentratutako asistentzia garatzea, enplegurako itzulera errazteko arau-aldaketak bultzatzea, izapide ekonomiko-administratiboak sinplifikatzea eta minbizi homogeneo eta eguneratuen populazio-erregistroak ezartzea ere.

“Gure aldarrikapen asko ez dira aldatzen. Jarraipen-protokoloak ez dira betetzen. Une honetan, gure osasun-sistemak ez du bermerik eskaintzen ezarritako denborei dagokienez. Pandemiak egoera aldatu eta zaildu egin zuela ulertzen dugu, baina nahikoa tarte egon da ordena berrezartzeko eta itxaron-zerrendak saihesteko. Badakigu talde profesionalek egiten duten ahalegina, langile falta eta lan-karga izugarria jasaten dutela, baina osasun publikoko arazo garrantzitsu baten aurrean gaude. 26 urte daramatzagu ekarpenak egiten, eta Saray gizarte-eragile gisa baloratzeko garaia dela uste dugu”.

Oraak, amaitzeko, lasterketa solidarioan parte hartzeko deia egin die herritarrei. Lasterketa hori urriaren 30ean, igandearekin, izango da, dirua biltzeko eta gaixotasun horren aurkako borrokarekin bat egiteko. “Gure aletxoa da. Ikerketa-proiektuetarako ekarpena 405.252 eurokoa da dagoeneko”.

Nafarroako Parlamentuak, bestalde, bere egoitzaren aurrealdea arrosa kolorez argiztatuko du gaur iluntzean (19:30-22:00).

Ekitaldian talde guztietako parlamentariak izan dira eta amaieran kanpainaren laz arrosa zeraman kartel batekin talde-argazkia atera dute. 

Nafarroako Bularreko Minbiziaren Elkartea (Saray) irabazi-asmorik gabeko erakundea da, eta laguntza psikosoziala, taldekoa, enplegu arlokoa, estetikoa eta aholkularitzakoa ematen die gaixotasun hori duten emakumeei eta haien senideei, prestakuntza, prebentzio eta garapen pertsonalean, bizitza errealean eta sozialean sartzen lagunduz. Gizarte osoa inplikatzeko jarduerak sustatzen ditu, eta bularreko minbizia ikertzeko proiektuak ekonomikoki laguntzen ditu.