Pobrezia eta gizarte-bazterkeria desagerrarazteko estrategiei buruzko jardunaldi bat egin da gaur arratsaldean Nafarroako Parlamentuan, Pobreziaren eta Gizarte Bazterkeriaren aurkako Nafarroako Sarearekin elkarlanean antolatuta, urriaren 17an ospatzen den Pobrezia Desagerrarazteko Nazioarteko Egunaren harira. Talde guztiek eskatuta hilaren 28an egingo den osoko bilkura monografikoa “prestatzeko” helburua izan du.

Hala berretsi du Unai Hualde Parlamentuko lehendakariak, gaineratuz jardunaldi honek “garrantzia berezia” duela, “hemendik aterako diren hausnarketak eta ekimenak hilaren 28ko saio berezian gauzatuko den eztabaidaren eta ebazpen-proposamenen oinarri izango direlako. Legegintzaldi honen azken txanpan sartuko gara, non gizarte-kolektiboekiko lanean arreta berezia jarri dugun. Garrantzitsua izan zen Pobreziaren eta Desberdintasunaren aurkako Nafarroako Itunaren eguneratzea sinatzea, baina garrantzitsuagoa da honen jarraipena egitea eta hitzartutakoa betetzen dela egiaztatzea. Horretan dihardugu”.

Esandakoaren ildotik, eta pandemiari eta, une honetan, Ukrainako gerrari lotutako krisi sozioekonomikoaren ondorioei dagokienez, presidenteak “zerbitzu publikoak hobetzera bideratutako gizarte-politikak aplikatzen jarraitzearen” alde egin du, “inor atzean gera ez dadin”. “Zaila da, eta Nafarroa beste lurralde batzuk baino egoera hobean dagoen arren, ez dugu autokonplazentzian erori behar. Aste erabakigarriak datozkigu, aurrekontuen eta balizko erreforma fiskalen eztabaida dugu aurretik. Une egokia da jardunaldi hau ospatzeko. Sarearen inplikazioa eskertu nahi dut, eta gaurkoa saio emankorra izatea espero dut”.

Ondoren, Carmen Maeztuk, Eskubide Sozialetako kontseilariak, adierazi du “NEIen Bizi Baldintzei buruzko azken Inkestaren arabera, 2020ko errenta-datuekin, eta, beraz, pandemiaren eraginarekin, Nafarroak AROPE gizarte-bazterketako tasarik txikiena zuen erkidegoa izaten jarraitzen zuela ( % 14,7) eta pobrezia-arrisku txikienekoa ( % 9,8)”.

Era berean, azpimarratu du “pandemiaren krisiaren aurrean, Ukrainako gerraren eta horrek energia-krisian eta bizi-kostuen igoeran izan duen eraginaren aurrean, Espainiako Gobernuaren eta Nafarroako Gobernuaren erantzuna gizarte-babeseko mekanismo guztiak indartzea izan dela, eta hala izaten jarraituko duela, kolpe guztiak gelditu ez dituen arren, funtsezkoa izan dena pobrezian eta desberdintasunean duen eragina murrizteko”. Ildo horretan, iragarri du "datorren urterako inoiz izan den aurrekonturik handiena izango dugula enpleguko eta gizarte-babeseko politika aktiboak indartzeko, bai Espainian, bai Nafarroan, eta horiek direla oinarririk sendoena benetan gizarteratzeko estrategiei aurre egin ahal izateko”.

Bestalde, Myriam Gómezek, Pobreziaren eta Gizarte Bazterkeriaren aurkako Nafarroako Sareko lehendakariordeak, adierazi du “une erabakigarrian gaudela” eta “benetako gizarteratzea eragin dezaketen estrategiak beharrezkoak” direla. “Pobrezia ekonomikoari buruzko datuak murriztu behar dira, eta aukerei dagokienez ekitatea sortu. Epe laburreko mugak gainditu behar dira, eta joera politiko guztiak batuko dituzten itunak egin. 2022rako Nafarroako Gizarteratze Plan Estrategikoa amaitzearekin batera hutsune bati egin behar diogu aurre, ildo estrategikoek zehaztuko dute etorkizuna eta horren arabera ikusiko dugu zein gizarte mota eraiki nahi den. Anbizio handiagoa duen begirada baten falta somatzen da”.

Jarraian, Elena Costas Pérezek eskaini du ponentzia markoa (telematikoki). Ekonomilaria da, Knowleadge Sharing Network-en sortzaileetako bat eta Politikon argitaletxeko editorea. Pobrezia murrizteko politikak Ongizate Estatuaren lehentasunen artean sartzea defendatu du. “Horrek esaten digu nora iritsi nahi dugun. Etorkizuneko erronka hori da”.

Jarraian, jardunaldira bertaratutakoak taldetan banatu dira, politika aktibo eta pasiboen diseinua, hizkuntzak politikan duen funtzio pedagogikoa edo gobernantza bezalako gaiei buruz hitz egiteko. Gaurko hausnarketekin, hilaren amaieran burutuko den osoko bilkura monografikorako iradokizunak helaraziko zaizkie talde parlamentarioei.

Pobreziaren eta Gizarte Bazterkeriaren kontrako Nafarroako Sarea 1994an sortu zen irabazi asmorik gabeko gizarte entitateen elkarte horizontal bezala pobreziaren eta gizarte bazterkeria desagerraraztea elkarrekin lantzeko. 22 gizarte entitatez osatu zen, eta gaur egun 30 erakunde sozialez osatuta dago, eta zubi lana egiten du entitateen, erakundeen eta pertsonen artean.