Nafarroako Parlamentuak Osoko Bilkura eginen du datorren asteartean, apirilaren 21ean (09:15), apirilaren 15eko 3/2020 Foru Lege-dekretua baliozkotzeko, zeinak premiazko neurriak onesten dituen koronabirusaren (COVID-19) osasun krisiak eragindako inpaktuari aurre egiteko.

Horrez gain, GIZAIN-Gizarte zerbitzu publikoak kudeatzeko Nafarroako fundazioarentzat kreditu berezi bat ematen duen Foru Lege proiektua ere eztabaidatuko da (presako prozeduraren bidez). Kasu honetan, zuzenketak aurkezteko epea astelehenean amaituko da, apirilaren 20an, 12:00etan.

Lehendakariaren martxoaren 25ko ebazpenarekin bat etorriz, boto-eskuordetza Parlamentuko idazkaritzaren aurrean formalizatu beharko da (apirilaren 20an, astelehenarekin amaituko da epea, 10:00etan), hark emanen baitu dagokion ziurtagiria. Interes publikoko arrazoiengatik gomendatzen bada ere, boto-eskuordetza borondatezkoa izanen da, ohartarazten baita “ezinezkoa” dela 50 parlamentarirekin Osoko Bilkura bat egitea.

Datorren asteartean ospatuko den osoko bilkura boto eskuordetuarekin eginen den laugarren izanen da, pasa den martxoaren 16an Parlamentuak eraikina eta haren zerbitzu guztiak itxi eta lan parlamentarioak murriztu zituenetik. Lan horiek Mahaiaren eta Eledunen Batzarraren bilkuretara eta beste legebiltzar-organo batzuen bilkura zehatzetara mugatu zituen —ahal dela bideokonferentziaz—, baldin eta atzeraezintzat jotzen diren premiazko arrazoiengatik egin behar badira. Hori guztia segurtasun-bermeekin eginen da, osasun-agintarien gomendioei jarraikiz.

Alarma egoera deklaratu zenetik, Nafarroako Parlamentuak hiru osoko bilkura egin eta bost lege onetsi ditu, horietako bi aurretik baliozkotutako Foru Lege-dekretuetan oinarritutakoak.

Apirilaren 8an Parlamentuko Osoko Bilkurak hiru foru lege onetsi zituen aho batez, zehazki, Covid-19ak eragindako osasun publikoko arrazoiak direla-eta hartutako neurri berezi eta urgenteek ekarritako behar bereziei erantzuteko kreditu-gehigarria ematen duena, kreditu berezia ematen duen legea eta Nafarroako 2020rako Aurrekontu Orokorrei buruzko martxoaren 4ko 5/2020 Foru Legea aldatzen duena.

Aurretik, apirilaren 3an, Legebiltzarrak bi Foru Lege onetsi zituen, koronabirusaren (COVID 19) osasun-krisiak eragindako inpaktuari erantzuteko premiazko neurriak indarrean jartzen dituzten martxoaren 18ko 1/2020 eta martxoaren 25eko 2/2020 Foru Lege Dekretuen edukia jaso eta zabaltzen dutenak. Lehena aho batez onetsi zen, eta bigarrena, berriz, EH Bilduren abstentzioarekin. Bi arauen indarraldiak egoera hau eragin duten baldintza bereziak desagertu artean iraunen du. Oinarrian dauden bi Foru Lege-dekretuak martxoaren 27an baliozkotu ziren aho batez.

Bestalde, gaur arratsaldean Mahaiak eta Eledunen Batzarrak bideokonferentzia bidez egin duten bilkuran ostiral honetarako, apirilaren 17rako aurreikusitako Foru Araubideko Batzordearen bilkura dela-eta talde parlamentarioek eta foru parlamentarien elkarteak egindako informazio eta dokumentazio eskariak ere zehaztu dituzte.

Onetsitakoaren arabera, Nafarroako Gobernuko Lehendakariak koronabirusaren (COVID-19) osasun krisiaren kudeaketari eta hartutako neurriei buruzko azalpenak ematen jarraitu beharko du, osasunaren, ekonomiaren, hezkuntzaren, kulturaren, eskubide sozialen eta landa garapenaren arloetan, besteak beste.

Foru Araubideko Batzordeak honako formatua izanen du: Nafarroako Gobernuko lehendakariaren hitzaldia, denbora mugarik gabe. Eledunen txanda, 10 minutuz, ordezkaritza handiena duenetik txikienera. María Chivitek 10 minutuz eledunei erantzuteko aukera izanen du eta ondoren eledunek 5 minutuko ihardespen txanda izanen dute. Amaitzeko, lehendakariak 5 minutu izanen ditu saioa ixteko.

Mahaiak martxoaren 27an erabaki zuen Foru Araubideko Batzordeak bilkura bat eginen duela astero, Nafarroako Gobernuaren eta talde parlamentarioetako eledunen arteko hartu-emanari eusteko Gobernua kontrolatzeko eginkizunaren esparruan. Kasu honetan koronabirusak eragindako krisi sanitarioari buruzko gaietara mugatuko da gai-ordena. Osasunaren Mundu Erakundeak martxoaren 11n koronabirusa nazioarteko pandemia gisa katalogatu zuenez geroztik egin diren gainontzeko bilkurak bezala, bilkura horiek Osoko Bilkuren aretoan eginen dira (streaming bidez).