Unai Hualde Parlamentuko lehendakariak José Antonio Sánchez Sánchez-Villarés Nafarroako Foru Komunitateko Fiskal Nagusiari harrera egin dio gaur bere bulego ofizialean, zeinak Nafarroako Fiskaltza Nagusiaren 2020ko Memoria eman dion. Sánchezek Lehendakaritzako, Berdintasuneko, Funtzio Publikoko eta Barneko Batzordean agerraldia egingo du, aurreikusitako bilera formalen barruan.

Bileran, José Antonio Sánchezek presidenteari Fiskaltzak Nafarroan dituen jarduera-ildo nagusiak helarazi dizkio, bai zehapen-arloan, baita arlo zibilean, bereziki adingabeak eta desgaitasuna duten pertsonak babesteko eginkizunetan, merkataritza-arloan eta administrazioarekiko auzietan.

Memoriak urtean zehar Nafarroako Fiskaltzan sartu diren prozedurei buruzko datuak biltzen ditu, horien bilakaera kuantitatiboa zein kualitatiboari dagokionez. Bestalde, fiskalaren jarduketa zehatzei buruzko datuak ere jasotzen ditu, izan iaz egindako akusazio-idazkiak, guztira 2.750 auzi penaletan, izan epaiketa penaletara joatea, guztira 2.728.

Zifra horiek, oro har, aurreko urteekiko alderatuz beherakada nabarmena adierazten dutela adierazi du Fiskal Nagusiak, izan ere, Covid-19aren aurkako neurrien esparruan prozesu-epeak etetearen ondorio dira, bai eta konfinamendu-garaian delitu-jarduera txikiagoa izatearen ondorioa ere.

Nafarroako Foru Komunitateko Fiskaltza Nagusia hogeita bat fiskalek osatzen dute. Fiskal nagusiak fiskaltza horren buruzagitza hartzen du bere gain.

Fiskaltzaren egoitza Iruñean dago. Tuterak lurralde-sail bat du, eta bertan lau fiskalek betetzen dituzte beren eginkizunak. Gainerako fiskalak bezala, Tuterakoak ere fiskal nagusiaren menpe daude zuzenean.

Fiskalaren eginkizun nagusia justiziaren ekintza sustatzea da, legezkotasuna, herritarren eskubideak eta legeak babestutako interes publikoa defendatzeko. Azken batean, legezkotasuna erabateko inpartzialtasunez defendatzea da haren zeregina.