Unai Hualde Nafarroako Parlamentuko lehendakariak harrera egin dio gaur Raji Sourani Giza Eskubideetarako Zentro Palestinarreko zuzendariari. Ondoren Bizikidetasunaren eta Nazioarteko Elkartasunaren Batzordean agerraldia egin du Gazako Zerrendaren egoeraren berri emateko.

Bileran Souranik Nafarroako herritarren elkartasuna eskertu du, Gazan bizi den muturreko egoera humanitarioa azaldu du eta "su-etena eta laguntza humanitarioa" ahalbidetzeko laguntza eskatu du. “Momentu honetan hori da garrantzitsuena. Epe ertainean, EBren eta Israelen arteko merkataritza akordioen haustura lortzeko eta, jakina, Palestinako Estatuaren onarpena lortzeko babesa biltzen jarraitzea da gure asmoa".

Testuinguru horretan, Souranik Hualderen aurrean salatu duenez, "Europako sestra bikoitza da, oro har Ukrainaren alde egin duelako eta Palestinaren kasuan alboz jarri delako, Espainia, Belgika, Irlanda eta Luxenburgoren salbuespenekin. Dagoeneko 56 urteko okupazioa eta 75 urteko apartheid-a dira, Israelgo Estatuak dituen adina urte", esan du.

Unai Hualdek, bere aldetik, eskerrak eman dizkio Souraniri hainbat taldek Parlamentuan agerraldia egiteko egindako eskaerari erantzuteagatik eta, era berean, egoera zuzenean bizi izan dutenen edo bizitzen ari direnen testigantzak entzutearen garrantzia azpimarratu du.

Hualdek Souraniri helarazi dio Parlamentuaren osoko bilkurak azaroaren 2an onartu zuen ebazpena, Gazako egoerak okerrera egin zuenean, eta jakinarazi dio gai honek elkartasun handia pizten duela Nafarroako gizartean.

Lidon Soriano BDZ (Israeli boikota, desinbertsioak eta zigorrak) taldeko eta Yala Nafarroa plataformako ordezkariarekin etorri da Raji Sourani. Yala Nafarroa plataformak hainbat GKE, sindikatu, alderdi politiko, osasun langile, kazetari eta ekintzaile batzen ditu Palestinako auziaren alde.