Nafarroako Parlamentuko lehendakariak, Ainhoa Aznárezek, eta Nafarroako Unibertsitate Publikoko Zabalpenerako eta Erakunde Harremanetarako Errektoreordeak, Eloísa Ramírezek, gaur sariak banatu dizkiete Nafarroako Unibertsitate Publikoaren Unibertsitateko XVIII. Eztabaida Ligako irabazleei.

Sari nagusia, 700 eurokoa, Sergio López Equiza, Miguel Rodríguez García, Nicolás de Augusto Oiz, Iratxe Remón Alzate eta Saturnino Sola Jiménezek osatutako taldeak jaso du.

Bigarren saria (500 euro) Rodrigo Arvizu Sarasa, Christian Artola de Almeida eta Luis Echarte Morenok osatutako taldeari egokitu zaio.

Eta hirugarrena (300 euro), Amaya Tanco Latienda, Álvaro Ranz Doncel, Pablo Garciandía Igal, Aitor Nicuesa García eta Gonzalo López Romerak osatutako taldeari.

Hizlari onenarentzako saria Christian Artola de Almeidak jaso du.

Ekitaldiaren hasieran Ainhoa Aznárez mintzatu da. Eztabaida eta elkarrizketa aldarrikatu ditu “informazioaren eta analisiaren bilaketari lotutako gaitasun pertsonalen garapenerako ezinbesteko tresna gisa, eta kasu honetan, baita entzuteko gaitasuna eta taldean erantzutearen gaitasuna ere bai. Hauteskunde kanpainan murgiltzen garen honetan, paper garrantzitsua duzue zuek programa, proiektu eta ideiak defendatzeko moduak aztertzeari dagokionez”.

Testuinguru horretan, Ainhoa Aznárezek azpimarratu du elkarrizketak eta eztabaidak indarrean dirautela bizikidetasunerako eta adostasunerako tresna gisa, “herritarren arteko loturak sendotzeko, baita informazioaren teknologien aroan ere. Unibertsitate Publikoari laguntzen segituko dugu komunikaziorako eta ikerketarako trebetasunak sustatzearekin zerikusia duen guztian. Mila esker zuen lanagatik eta zorionak emaitzengatik”.

NUPeko Eloísa Ramírez errektoreordeak zoriondu egin ditu irabazleak eta Nafarroako Parlamentuari esker ona adierazi dio “elkarrizketaren eta adostasunaren balioak transmititzen dituelako egungo gizartearentzat eta areago gazteriarentzat garrantzi berezia duen hezkuntza-jarduera honi eusten laguntzeagatik”.

Hizlari onenarentzako sariaren irabazlea, Christian Artola de Almeida, eztabaidari buruz mintzatu da “desberdin pentsatzen duten baina denen ongizatea helburu duten gizaki arrazionalen arteko topaleku gisa, eta horregatik gaur inoiz baino gehiago, ezinbestekoa da ideien esparruan akordioetara iristea. 20 mendetan zehar gizakiek eraikitako zubi guztiak suntsitzen ari dira gaur egun. Ur uher hauekin amaitzea eskatzen du bakean oinarritutako elkarbizitzak”.

Erakunde-aretoan egindako ekitaldi horretan aritu da, halaber, Miren Sarasibar, NUPen Eztabaida Ligaren ardura duen irakaslea.

Parlamentuak eta NUPek urtero sinatzen duten hitzarmenaren jarduketa-esparruan egiten da Nafarroako Unibertsitate Publikoaren Unibertsitateko Eztabaida Liga, beste jarduera batzuekin batera. Unibertsitate Proiekziorako Errektoreordetzak antolatzen du, eta elkarrizketa nahiz ideien arteko jendaurreko lehia sustatzea du helburu, bizikidetasuna lantzeko eta trebetasun pertsonalak garatzeko ariketa gisa.

Puntuak emateko garaian epaimahaiak aintzat hartzen ditu, beste alderdi batzuen artean, azalpenaren ordena, argitasuna eta erraztasuna, lantaldearen jarrera, ziurtasuna izatea eta gaia ongi ezagutza, frogen zorroztasuna, keinuen erabilera, aurkakoaren baliabideen integrazioa edo bizkor erantzutea.