Unai Hualde Nafarroako Parlamentuko lehendakariak Patxi Vera Foru Komunitateko Arartekoari harrera egin dio gaur bere bulegoan. Patxi Verak 2021eko ekitaldiari dagokion urteko txostena aurkeztu dio lehendakariari. Txosten horretan 3.547 jarduketa jaso dira, 2020an baino 154 gehiago, hau da, % 4,54 gehiago.

2021ean egin den lanaren bitartez, 128 iradokizun (beste 20 arauen inguruan), 287 gomendio eta legezko betebeharren 55 oroigarri helarazi zaizkie Nafarroako administrazio publikoei (490 erabaki, guztira). Hori guztia erakundearengana jo duten 6.034 herritarren ekimenaren emaitza izan da; 1.923 kontsulta egiteaz gain, 1.408 kexa aurkeztu dituzte, besteak beste (1.540 espediente sorrarazi dituzte); kexa horietatik % 82 izapidetzeko onartu dira. Bestalde, 1000 ikerketa egin dira; horietatik 965 jasotako kexen ondoriozkoak izan dira, beste 21 ofizioz egin dira eta 14 herritarren proposamenei lotuta.

Kexa gehien eragin dituzten hamar arloak honako hauek dira, kexa kopuruaren araberako ordenan: covid-19 (200), hezkuntza (128), gizarte ongizatea (118), enplegu publikorako sarbidea (86), etxebizitza (83), trafikoa eta bide-segurtasuna (79), ogasuna (74), funtzio publikoa (73), osasuna (73) eta ingurumena (63.)

Unai Hualde Legebiltzarreko presidenteak adierazi duenez, Ararteko berriak Legegileari helarazi dion memoria zabalak “berretsi baino ez du egiten Ganberak 2021ean izan duen jarduera oparoa, bai eta herritarren eta Administrazioaren arteko bitartekaritza-lanaren garrantzia ere. Hori guztia Arartekoaren bulegoaren jarraikortasuna zalantzan jarri duten sektore batzuen mezuen aurrean”.

Lehendakariari aurkeztu ondoren, Patxi Verak 2021eko urteko txostena Foru Araubideko Batzordean aurkeztuko du eta, ondoren, Osoko Bilkuran.

Arartekoen Koordinazio Jardunaldiak prestatzeko tailerra

Unai Hualde Nafarroako Parlamentuko lehendakariak Arartekoen Koordinaziorako  Jardunaldiak prestatzeko tailerrari hasiera eman dio gaur, bertaratutakoei ongi etorria emanez. Landa-eremuan osasun-zerbitzu publikoaren prestazioa aztertzeko jardunaldiak Leonen egingo dira datorren udazkenean.

Hasierako hitzaldian, Unai Hualdek Arartekoaren erakundeak “kalitate demokratikoa kontrolatzeko eta indartzeko” duen garrantzia azpimarratu du, bere ustez “ezinbestekoa baita gobernantzak hobeto funtziona dezan”, eta bulegoen arteko harremana estutzearen alde egin du, besteak beste, “herritarren konfiantza bereganatzeko”.

Testuinguru horretan, eta Arartekoaren figura “duela urte batzuk Estatuko hainbat eremutan zalantzan jarri zela” gogorarazi ondoren, lehendakariak berretsi du beharrezkoa dela haien lana baloratzea, “duten zeregina funtsezkoa delako. Gure kasuan, Patxi Vera buru duen aro berri bati ekin berri diogu. Bulego honek, Nafarroako Parlamentuaren menpe dagoen Kontuen Ganberarekin gertatzen den bezala, Foru Administrazioaren jarduera gainbegiratzen du, eskubide eta askatasun publikoak babesteko”.

Amaitzeko, eta Leonen urteko hirugarren lauhilekoan egingo diren jardunaldien gaitegiari dagokionez, lehendakariak gogorarazi du landa-eremuko osasun-zerbitzuaren egoera “errepikatzen den gai bat” dela, “lurralde-kohesioarekin eta, beraz, berdintasunarekin lotuta dagoena, kasu honetan despopulazioaren problematikak nolabait baldintzatuta. Eztabaidaren ondorioak arretaz jarraituko ditugu. Eskerrik asko etortzeagatik eta gure hirian egonaldi ona opa dizuegu”.

Arartekoak Koordinatzeko Jardunaldiak prestatzeko tailerrean Arartekoen bederatzi bulego autonomikoetako teknikariek parte hartu dute. Zehazki, bulego hauetako teknikariak: Gorte Nagusietako Arartekoa, Andaluziakoa, Aragoikoa, Valentziakoa, Euskal Autonomi Erkidegokoa, Galiziakoa, Kanarietakoa, Gaztela eta Leongoa eta Nafarroakoa.