Parlamentuaren Osoko Bilkurak gaur onetsi du, UPN, PSN, EH Bildu, Geroa Bai, PPN eta Contigo-Zurekin taldeek aldeko botoa emanda, atxiki gabekoaren abstentzioarekin eta Talde Mistoak aurkako botoa emanda, foru-lege bat, 10.339.400 euroko kreditu-gehigarriak eta 10.936.646 euroko aparteko kreditua ematen dituena, zenbait departamenturen finantzaketa-beharrei erantzuteko.

Foru Gobernuak bultzatutako foru-legea joan den apirilaren 15eko Gobernuaren erabakitik dator, zeinaren bidez onesten baita 2025eko Inbertsio Programa eguneratzea eta handitzea, gehienez 271 milioiko zenbatekoan, eta 2024an lortutako superabitetik datorren diruzaintzako gerakinaren kargura finantzatuta.

Memoria eta Bizikidetza, Kanpo Ekintza eta Euskara Departamentuaren beharretarako aparteko kredituaren zenbatekoa aurrekontu-partida hauei aplikatuko zaie: Memoriaren Tokiak (45.000); Memoriaren basoa sortzea (10.000); Rozalejo jauregia. Ikus-entzunezko ekipamendua (30.000).

Barneko, Funtzio Publikoko eta Justiziako Departamentuaren beharretarako aparteko kredituaren zenbatekoa honako aurrekontu-partida hauei aplikatuko zaie: Eraikin judizialetako instalazioak (40.000); Tracasa Instrumental-i egindako enkargua. Informazio-sistemak (52.000); Pertsonak garraiatzeko ibilgailuak (165.000); Herritarren arretarako bulegoetako eta Foruzaingoaren bulegoetako obrak (227.000); Ibilgailuen trafikoa (1.435.500); Informazioa prozesatzeko ekipoak. Mugikortasun-proiektua (362.750); Tracasa Instrumentala-i enkargua. Informazio-sistema (250.000), eta Suhiltzaile-parkeetako obrak (12.000).

Unibertsitate, Berrikuntza eta Eraldaketa Digitaleko Departamentuaren beharretarako aparteko kredituaren zenbatekoa honako aurrekontu-partida hauei aplikatuko zaie: NUP, Tuterako Campusa, lurzati-desjabetzea (1.000.000); Nasertic-i enkargua, Polo Iris biologia sintetikoko laborategiko ekipoak (1.000.000), eta Nasertic-i enkargua, Polo Iris azpiegitura konputazionala (500.000).

Kreditu guztiak Diruzaintza-gerakina gastu orokorretarako partidan erabilgarri dagoen saldoaren kargura finantzatuko dira (10.936.646).

Kreditu-gehigarriaren zenbatekoa Etxebizitza, Gazteria eta Migrazio Politiketako Departamentuaren beharrak finantzatzera bideratuta dago (9.500.000 euro), Nasuvinsaren bidez alokairuko etxebizitzak sustatzeko eta eraikitzeko; Osasun Departamentura (627.400), Unibertsitate Ospitalea antolatzeko eta birmoldatzeko obretarako; eta Unibertsitate, Berrikuntza eta Eraldaketa Digitaleko Departamentura (212.000), Tuterako campuseko jarduera fisikoaren eta kirolaren zientzietako graduko eraikinerako. Gehigarri guztiak Diruzaintza-gerakina gastu orokorretarako partidaren kargura finantzatuko dira (10.339.400 euro).

Nafarroako Ogasun Publikoari buruzko apirilaren 4ko 13/2007 Foru Legearen 4. artikuluak ezartzen du foru-legez arautu behar direla Nafarroako aurrekontu orokorrak, bai eta haietan egindako aldaketak ere, aparteko kredituak edo kreditu-gehigarriak emateari buruzkoak badira. Beraz, gastu-aurrekontuan esleitutako kreditu nahikorik ez dagoenez eta 48. artikuluari jarraikiz, bidezkoa da lege hau onestea, kasu honetan irakurketa bakarrean. Lege honek Nafarroako Aldizkari Ofizialean argitaratu eta biharamunean hartuko du indarra.

• https://parlamentodenavarra.es/eu
• Foru-lege proiektua (42. NPAO, 2026-04-28koa)