Berriak

Parlamentuko Osoko Bilkurak gaur, SN, Nabai, Bildu eta I-Ek alde emandako botoekin eta UPN eta PPNk kontra emandakoekin, ebazpena onetsi du zeinaren bidez Ganberak “arbuiatzen duen Aurrekontu, tributu eta finantza arloko presako neurriei buruzko abenduaren 30eko 20/2011 Errege Lege-dekretua. Izan ere, Parlamentuaren ustez, neurri horiek ez dute balio krisi ekonomiko larriari aurre egiteko; aitzitik, lanpostu gehiago suntsitzea eta langabezia areagotzea ekarriko dute.

Parlamentuko Osoko Bilkurak gaur, SN, Nabai, Bildu eta I-Ek alde emandako botoekin, UPNren abstentzioarekin eta PPNk kontra emandako botoarekin, Ganberak “DBHren egungo egitura, lau ikasmaila, bere horretan mantentzearen alde dagoela adierazten duen” ebazpena onetsi du.

Onetsitako ebazpenak bigarren puntu ba du, zeinetan, halaber, Ganberak batxilergoaren egungo egitura, bi ikasmaila, bere horretan mantentzearen alde dagoela adierazten duen. SN, Nabai eta I-Ek alde bozkatu dute eta Bildu eta UPNk kontra.

Parlamentuko Osoko Bilkurak ahobatez onetsi du gaur Nafarroako Gobernua “Europako Parlamentuak eta Europar Kontseiluak 2012an abian jarri duten Zahartze Aktiboaren eta Belaunaldien Arteko Elkartasunaren Aldeko Europako Urtearen ospakizunekin eta jarduerekin bat egin dezan” premiatzen duen ebazpena.

Onetsitako ebazpenak bigarren puntu bat du, zeinetan, halaber, Nafarroako Gobernua premiatzen den “txosten bat igor diezaion Adinekoen Estatu Kontseiluari, Nafarroan baliatutako politiketan oinarritutako ekarpen zehatzak eginen dituena Adinekoaren Estatutua taxutzeko”.

Parlamentuko Osoko Bilkurak, SN, Nabai, eta Bilduk alde emandako botoekin eta UPN, I-Eren abstentzioekin eta PPNk kontra emandako botoarekin, ebazpena onetsi du gaur, zeinaren bidez Espainiako Gobernua premiatzen den “euts diezaion Derrigorrezko Bigarren Hezkuntzaren gaur egungo egiturari, horrela laugarren mailaren desagerpena saihestuz, eta azterlan xehakatu bat egin dezan, Batxilergoa hiru urtekoa izateko luzatzearen beharrari buruzkoa”.

Parlamentuko Osoko Bilkurak UPN, SN, PPN eta I-Ek alde emandako botoekin eta Nabai eta Bildu-ren abstentzioekin, Nafarroako Gobernua “Botere Judiziala Sexu-esplotaziorako emakume-salerosketari buruzko Nafarroako Foroko kide gisa sar dezan” premiatzen duen ebazpena onetsi du gaur.

Parlamentuko Osoko Bilkurak “jaio berrien ustezko lapurreten eta legez kanpoko adopzioen” inguruko Ikerketa Batzorde bat sortzeko proposamena ahobatez onetsi du gaur, biak “interes publikokotzat” jotzen baitu.

Zioen azalpenean, SN eta Bildu parlamentu-taldeek eskaera oinarritzen dute pasa den martxoaren 14an Lehendakaritzako, Administrazio Publikoetako eta Barneko Batzordearen altzoan egin zen lan bileran ‘SOS Bebés Robados Navarra’ Elkarteak azaldutako “ekintza larrietan”.

Parlamentuko Osoko Bilkurak, UPN, SN, Nabai, Bildu eta I-Ek alde emandako botoekin eta PPNren abstentzioarekin, ebazpena onetsi du gaur Espainiako Gobernua premiatzen duena “gaur egungo beka-sistema manten dezan, aukera berdintasuna babestea eta ikasleria guztiaren inklusioa, hezkuntza bikaintasuna eta kalitatea lortzea ahalbidetuko duen eta denona den eskubidea dela ulertzen baita”.

Onetsitako ebazpena UPNk aurkeztutako eta SNk, proposatu duen taldeak, onartutako ordezkatze zuzenketa baten ondorio da.

Parlamentuko Osoko Bilkurak, UPN eta SNk alde emandako botoekin, Nabai eta PPNk abstentzioekin eta Bildu eta I-Ek kontra emandako botoekin, Foru Legea onetsi du gaur, Nafarroako Enpresa Korporazio Publikoa izeneko sozietatea sortzeari buruzko ekainaren 18ko 8/2009 Foru Legea aldatzen duena.

8/2009 Foru Legea enpresa publikoen kopurua 13ra murrizteko eta Nafarroako Enpresa Korporazio Publikoaren, S.M.P.aren, holdingean haien parte hartzea bateratzeko helburuarekin promulgatu zen.

Nafarroako Parlamentuko Osoko Bilkurak herriaren legegintza-ekimena arautzen duen 3/1985 Foru Legea eta Nafarroako udalen legegintza-ekimena arautzen duen 4/1985 Legea aldatzen dituen Foru Lege proposamena aintzat hartzea ahobatez onetsi du gaur.

SNk aurkeztutako Foru Lege proposamenak helburu du afera publikoetan parte hartzeko eskubidearen egiazko gauzatzea sendotzea, Nafarroako herritarrei bizitza parlamentarioan “zuzenago eta eraginkorrago” parte hartzeko bidea emanez.

Parlamentuko Osoko Bilkurak UPN, SN, Nabai, Bildu eta I-Ek alde emandako botoekin eta PPNk kontra emandakoarekin ebazpena onetsi du gaur, Espainiako Gobernua premiatzen duena “behar diren lege-mekanismoak eta arauak artikula ditzan, Nafarroako Gobernuko ordezkariak Espainiako Gobernuko ordezkariekin batera joan daitezen Ekonomia eta Finantza Kontseiluaren (ECOFINen) bilkuretara, Nafarroako Foru Komunitatearen eskumena diren arlo fiskalekin lotutako gaiak aztertzen direnean”.