Berriak

Parlamentuko Osoko Bilkurak, UPNk, SNk, Aralar-Nabaik, PPNk eta atxiki gabeko bi parlamentariek haren alde emandako botoekin eta Bildu-ren eta I-Eren abstentzioekin, Kontratu Publikoei buruzko ekainaren 9ko 6/2006 Foru Legea aldatzen duen Legea onetsi du gaur.
 

Legearen helburua Nafarroako kontratazio publikoaren araudia aldatzea da, hartara 2007/66/EE Zuzentarauari eta Europako Justizia Auzitegiak enkarguen, kontratual aldatzearen etab.-en karietara esandakoari egokitzeko.
 

Parlamentuko Osoko Bilkurak, UPNk, SNk, Bildu-k, Aralar-Nabaik, PPNk eta atxiki gabeko bi parlamentariek haren alde emandako botoekin eta I-Eren abstentzioarekin, Nafarroako Toki Administrazioari buruzko uztailaren 2ko 6/1990 Foru Legearen VI. titulua aldatzen duen Legea onetsi du gaur.
 

Legearen xedea Nafarroako toki-entitateei aplikagarri zaien kontratuen inguruko araudia 2007/66EE Zuzentarauan xedatutakora doitzea da.
 

Parlamentuak aho batez onetsi du gaur Andosillako Udalari dagozkion 84.698 metro koadroren onura publikoa deklaratu eta haien desafektazioa onesten duen Foru Legea.

Neurriaren xedea ondoren 142.895,53 metro koadrorekin truke egitea da, hartara, “Santa Cruz baselizaren inguruan eremu bat sortzeko; izan ere garrantzi handiko tokia da Andosillako bizilagunentzat, bertan erromesaldiak eta erromeriak ospatzen baitira. Etorkizunean, gainera, turismoaren eta ingurumenaren arloko jarduketak egiteko asmoa dago”.

Parlamentuko Osoko Bilkurak aho batez onetsi du gaur bermatutako prestazio sozialak eta ikasketetarako bekak enbargaezinak deklaratzen dituen Foru Legea.

Parlamentuko Osoko Bilkurak aho batez onetsi du gaur elikagaien hondakinen erabilerari buruzko Foru Legea, Nafarroako merkataritzari buruzko 17/2001 Foru Legea aldatzen duena.

Izquierda-Ezkerrak aurkeztutako ebazpenaren (PPNk zuzendutakoa) xedea da Nafarroan sortutako elikagaien hondakinak ahalik eta gehien murriztea eta egoera zailean dauden herritar guztiei elikadura egokia bermatzea, izan ere, azken datuen arabera, Nafarroako biztanleen % 18 “pobrezia arriskuan” dago.

Parlamentuko Osoko Bilkurak, SNk, Bildu-k, Aralar-Nabaik, I-Ek eta atxiki gabeko bi parlamentariek haren alde emandako botoekin eta UPNk eta PPNk haren aurka emandako botoekin, Nafarroan bizi diren pertsonei Nafarroako osasun-sistema publikoan doako osasun-laguntza jasotzeko eskubidea aitortzen dien Foru Legea onetsi du gaur.

Parlamentuak ebazpen bat aho batez onetsi du gaur, zeinaren bidez Nafarroako eta Espainiako Gobernua premiatzen diren “2001/37/CEE Zuzentarauaren aldaketaren garapenari dagokionez erne egotera, tabako-sektorearen interesak bermatze aldera, hartara, aldaketa horiek enpleguan izan litzaketen eragin kaltegarriak saihesteko”.

Onetsitako ebazpena SNk, ekimenaren titularrak, onetsitako eta talde guztiek sinatutako in voce ordezkatze-zuzenketa baten ondorio da.

Parlamentuak ebazpen bat aho batez onetsi du gaur, zeinaren bidez “bere mespretxua eta gaitzespena erakusten dizkie beren egoeratik probetxua atera eta beraien aurrean babesgabe dauden herritarren diru publiko zein pribatuarekin irabaziak lortze aldera ustelkeriazko jokabideak aurrera eraman dituzten edo eramaten ari diren pertsona, entitate, alderdi edo enpresa publiko nahiz pribatu guztiei, zeinek horretarako baliatu baitituzte beren kargu publikoak, botere politiko nahiz ekonomikoa, botere horretan daudenekiko hurbiltasuna, informazio pribilegiatua edo beste edozein arrazoi”.

Parlamentuko Osoko Bilkurak ebazpen bat aho batez onetsi du gaur zeinaren bidez Nafarroako Gobernua premiatzen den “ez diezaien dietarik ordaindu bilkuretara joaten ez diren Nafarroako Enpresa Korporazio Publikoko administrazio kontseiluetako kideei”.

Mozioak bigarren puntu bat zuen, bideratuta zegoena “bertan behera utz dezan” aipaturiko administrazio kontseiluetan, “Nafarroako Parlamentuko kideei ezarritako dieten ordainketa”. Puntu hori UPNk eta SNk haren aurka emandako botoekin bazter utzi da. Bildu-k, Aralar-Nabaik, PPNk eta atxiki gabekoen babesa ez da nahikoa izan.

Parlamentuko Osoko Bilkurak, SNk, Bildu-k, Aralar-Nabaik, PPNk eta atxiki gabeko parlamentariek haren alde emandako botoekin eta UPNk eta PPNk haren aurka emandako botoekin, Nafarroako Gobernua “Osasun Departamentuak ospitale arteko garraio zerbitzuaren kostuaren osotasunean bere gain har dezan” premiatzen duen ebazpena onetsi du gaur.